3 ບັນຫາ​ຫຼັກ​ເຮັດ​ໃຫ້ການ​ສົ່ງ​ອອກ​ສິນຄ້າ​ກະ​ສິ​ກໍາ ໄປ ສປ ຈີນ ພົບ​ຄວາມ​ຫຍຸ້ງຍາກ ປະກອບ​ມີ 1) ບັນຫາ​ແອ​ອັດ​ຂອງ​ລົດ​ຂົນສົ່ງ​ສິນຄ້າ​ຢູ່​ດ່ານ ແລະ ຄ່າ​ຂົນສົ່ງ​ສູງ; 2) ບັນຫາ​ການ​ໄດ້​ຮັບ​ບຸລິ​ມະ​ສິດ​ຂອງ​ບາງ​ບໍລິສັດ​ໃນ​ການ​ສົ່ງ​ອອກ​ສິນຄ້າ; ແລະ 3) ບັນຫາ​ການ​ສົ່ງ​ອອກ​ມັນ​ດ້າງ ແລະ ພືດ​ກະສິກຳ​ອື່ນໆ ໄປ ສປ ຈີນ ຂອງ​ຜູ້​ລົງທຶນ​ປູກ ແລະ ຜະລິດ ຢູ່ ແຂວງ​ອຸດົມ​ໄຊ. ຊຶ່ງ​ບັນຫາ​ດັ່ງກ່າວ ໄດ້​ຖືກ​ນຳ​ມາ​ປຶກສາ​ຫາລື ແລະ ເປັນ​ເອກະ​ພາບ​ໃນ​ກອງ​ປະຊຸມ​ຄັ້ງ​ນີ້ ເພື່ອ​ແກ້​ໄຂ​ຢ່າງ​ຮີບ​ດ່ວນ ແລະ ທັນ​ກັບ​ສະພາບ​ການ.

ອີງ​ຕາມ​ຂໍ້​ມູນ​ຂອງ​ສູນ​ຂໍ້​ມູນ​ຂ່າວສານ​ທາງ​ດ້ານ​ການ​ຄ້າ​ຂອງ ສປປ ລາວ ໃຫ້​ຮູ້​ວ່າ: ເມື່ອ​ບໍ່​ດົນ​ມາ​ນີ້ ກົມ​ນຳ​ເຂົ້າ ແລະ ສົ່ງ​ອອກ ກະຊວງ​ອຸດສາຫະກຳ ແລະ ການ​ຄ້າ ຮ່ວມ​ກັບ​ພາກສ່ວນ​ກ່ຽວຂ້ອງ​ໄດ້​ຈັດ​ກອງ​ປະຊຸມ​ເພື່ອ​ປຶກສາ​ຫາລື​ຫາ​ຊ່ອງ​ທາງ​ແກ້​ໄຂ ຂອດ​ຫຍຸ້ງຍາກ​ໃນ​ການ​ສົ່ງ​ອອກ​ສິນຄ້າ​ກະ​ສິ​ກໍາ ໄປ ສປ ຈີນ ໂດຍ​ໄດ້​ຂໍ້​ສະຫຼຸບ​ມີ 3 ບັນຫາ​ຫຼັກ ດັ່ງນີ້:

1). ບັນຫາ​ແອ​ອັດ​ຂອງ​ລົດ​ຂົນສົ່ງ​ສິນຄ້າ ແລະ ຄ່າ​ຂົນສົ່ງ​ສູງ ຢູ່​ດ່ານ​ບໍ່​ເຕ່ນ​-​ບໍ່​ຫານ ແມ່ນ ​ມີ​ທິດ​ທາງ​ແກ້​ໄຂ​ຄື: ໃຫ້​ລັດ ຖະບານ​ຝ່າຍ ສປປ ລາວ ເຈລະ ຈາ​ກັບຝ່າຍ ສປ ຈີນ ຮ່ວມ​ມື​ເປັນ​ເອກະ​ພາບ​ກັນ​ທັງ​ສອງ​ຝ່າຍ ເພື່ອ​ດໍາ​ເນີນ​ການ​ຄວບ​ຄຸມ​ຮ່ວມ​ກັນ (Common Control Area) ໃນ​ການ​ນໍາ​ໃຊ້​ລະບົບ​ສາງ​ພັກ​ສິນຄ້າ ທີ່​ເອື້ອ​ອໍາ​ນວຍ​ຂຶ້ນ; ກົມ​ຂົນສົ່ງ ກໍາ​ລັງ​ຄົ້ນ​ຄ້​ວາ​ສ້າງ​ນິຕິ​ກໍາ ເພື່ອ​ກໍາ​ນົດ​ໂຄງ​ປະກອບ​ລາຄາ​ຄ່າ​ຂົນສົ່ງ ເພື່ອ​ບໍ່​ໃຫ້​ຜູ້​ປະກອບ​ການ​ຂົນສົ່ງ​ບາງ​ຄົນສວຍໂອກາດ​ຂຶ້ນ​ລາ ຄາ​ຂົນສົ່ງ​ສິນຄ້າ​ເກີນ​ເພດານ​ ທີ່​ກໍາ​ນົດ​ໄວ້; ສ້າງ​ເງື່ອນໄຂ ​ເປີດ ​ກວ້າງ​ການ​ລົງທຶນ​ດ້ານ​ໂລ​ຈິສ​ຕິກໃຫ້​ຫຼາຍ​ຂຶ້ນ ​ເພື່ອ​ເປັນ​ທາງ​ເລືອກ ແລະ ສ້າງ​ທ່າແຮງ​ແຂ່ງຂັນ​ດ້ານ​ການ​ບໍລິການ​ຂົນ ສົ່ງ​ໃຫ້​ຫຼາ​ກ​ຫຼາຍ​ຂຶ້ນ ຊຶ່ງ​ຈະ​ສົ່ງ​ຜົນໃຫ້​ລາຄາ​ຂົນສົ່ງ​ສົມເຫດ​ສົມ​ຜົນ ແລະ ມີ​ຫຼາຍ​ທາງ​ເລືອກ​ດ້ານ​ການ​ບໍລິການ​ຂົນ​ສົ່ງ.

2). ບັນຫາ​ການ​ໄດ້​ຮັບ​ບຸລິ​ມະ​ສິດ​ຂອງ​ບາງ​ບໍລິສັດ​ໃນ​ການ​ສົ່ງ​ອອກ​ສິນຄ້າ ໄປ ສປ ຈີນ ແມ່ນ​ມີ​ທິດ​ທາງ​ແກ້​ໄຂ​ຄື: ອີງ​ຕາມ​ແຈ້ງ​ການ ເລກ​ທີ 1393/ຫສນຍ, ລົງ​ວັນ​ທີ 16 ສິງຫາ 2019 ແມ່ນ​ໄດ້​ປະກາດ​ເປັນ​ເອກະ​ພາບ​ແລ້ວ​ວ່າ 2 ບໍລິສັດ​ຂົນສົ່ງ LS ແລະ LICD ຈະ​ບໍ່​ມີ​ສິດ​ຜູກຂາດ​ໃດໆ​ໃນ​ການ​ໃຫ້ການ​ບໍລິການ ຊຶ່ງ​ຫົວໜ່ວຍ​ທຸລະ​ກິດ​ນໍາ​ເຂົ້າ​-​ຂົນສົ່ງ ສາມາດ​ແຈ້ງ​ພາສີ​ສິນ ຄ້າ​ເຂົ້າ​-​ອອກ ໄດ້​ດ້ວຍ​ຕົນ ເອງ ແລະ ຍັງ​ມີ​ສິດ​ເລືອກ​ໃຊ້ບໍລິ ການ​ສາງ​ພັກ​ສິນຄ້າ ແລະ ສະ ຖານທີ່​ຄ່ຽນ​ຖ່າຍ​ສິນຄ້າຂອງ​ສອງ​ບໍລິສັດ​ໄດ້  ຊຶ່ງ​ທັງ​ສອງ​ບໍລິສັດ​ ໄດ້ສະແດງ​ກະດານ​ລາຄາ​ຄ່າ​ບໍລິການ​ຢ່າງ​ຊັດ​ເຈນ ແລະ ຢູ່​ໃນ​ເກນ​ກໍາ​ນົດ​ເພື່ອ​ສະແດງ​ເຖິງ​ຄວາມ​ໂປ່​ງ​ໃສ ແລະ ປະຕິບັດ​ຕາມ​ລະບຽບ​ກົດໝາຍ​ທີ່​ໄດ້​ວາງ​ອອກຕາມ​ລັດ​ຖະ​ບັນຍັດ​ຂອງ​ປະທານ​ປະເທດ ເລກ​ທີ 003/ປປທ, ລົງ​ວັນ​ທີ 26 ທັນວາ 2012 ແລະ ແຈ້ງ​ການ​ຂອງ​ກະຊວງ​ອຸດ​ສາ​ຫະ​ກໍາ ແລະ ການ​ຄ້າ ເລກທີ 1291/ກຄ.ພນ, ລົງ​ວັນ​ທີ 5 ສິງຫາ 2008; ກົມ​ຄຸ້ມ​ຄອງ​ວິ​ສາ​ຫະ​ກິດ​ລັດ​ລົງທຶນ ແລະ ການ​ປະກັນ​ໄພ ແລະ ລັດ​ວິ​ສາ​ຫະ​ກິດ​ສາງ​ທ່າ​ນາ​ແລ້ງ, ກະຊວງ​ການ​ເງິນ ກໍາ​ລັງ​ປັບປຸງ ແຈ້ງ​ການເລກ​ທີ 1291/ກຄ.ພນ ໃຫ້​ສອດຄ່ອງ​ກັບ​ສະພາບ​ການ​ຕົວ​ຈິງ ແລະ ຈະ​ຊ່ວຍ​ອໍາ​ນວຍ​ຄວາມ​ສະດວກ​ຢູ່​ສາງ​ໄດ້​ຫຼາຍ​ຂຶ້ນ  ໂດຍ​ຄາດ​ຄະ​ເນຈະ​ສໍາ​ເລັດ​ພາຍ​ໃນ​ປີ 2020 ນີ້; ບັນຫາການ​ຈ່າຍ​ອາກອນ​ແບບ​ຮັບ​ເໝົາ​ແມ່ນ​ບໍ່​ເໝາະ​ສົມ ຊຶ່ງ ສະແດງ​ໃຫ້​ເຫັນ​ວ່າ ຄັດ​ກັບ ກົດ ໝາຍ ແລະ ລະບຽບ​ການ​ກ່ຽວ​ກັບ​ວຽກ​ງານ​ສ່ວຍ​ສາ​ອາກອນ ຊຶ່ງ​ພາກສ່ວນ​ທີ່​ກ່ຽວຂ້ອງກໍາ​  ລັງ​ລໍຖ້າ​ທິດ​ຊີ້​ນໍາ​ຈາກ​ຂັ້ນ​ເທິງ.

3). ບັນຫາ​ການ​ສົ່ງ​ອອກ​ມັນ​ດ້າງ ແລະ ພືດ​ອື່ນໆ ໄປ ສປ ຈີນ ຂອງ​ຜູ້​ລົງ​ທຶນຢູ່ແຂວງ​ອຸ ດົມ​ໄຊ ທີ່​ບໍ່​ໄດ້​ຮັບ​ສິດ​ໃນ​ການ​ສົ່ງ​ອອກ​ສິນຄ້າ​ກະ​ສິ​ກໍາ ໄປ ສປ ຈີນ ໂດຍ​ກົງ ແຕ່​ຕ້ອງ​ໄດ້​ຜ່ານ​ຫຼາຍ​ບໍລິສັດ​ທີ່​ໄດ້​ຮັບ​ສິດ​ສົ່ງ​ອອກ. ສະນັ້ນ, ບໍລິສັດ​ທີ່​ລົງທຶນ​ປູກ​ຕົວ​ຈິງ ຈຶ່ງ​ມີ​ຫຼາຍ​ຂັ້ນ​ຂອດ ແລະ ຄ່າ​ໃຊ້​ຈ່າຍ​ສູງ​ໃນ​ການ​ຂົນສົ່ງ​ໄປ ສປ ຈີນ ຊຶ່ງ​ໃນ​ກອງ​ປະຊຸມ​ໄດ້​ມີ​ທິດ​ທາງ ແລະ ແກ້​ໄຂ ດັ່ງນີ້: ການ​ຈະ​ໄດ້​ຮັບ​ສິດ​ໃນ​ການ​ສົ່ງ​ອອກ​ມັນ​ດ້າງ ໄປ ສປ ຈີນ ຕ້ອງ​ໄດ້​ປະຕິບັດ​ຕາມ​ເງື່ອນໄຂ ແລະ ມາດ​ຕະການ​ຂອງ​ອົງການ GACC ຢ່າງ​ເຂັ້ມ​ງວດ. ສະນັ້ນ, ມາດ​ຕະການ​ແກ້​ໄຂ​ໃນ​ໄລຍະ​ຜ່ານ​ມາ ແມ່ນ​ໃຫ້​ສົ່ງ​ອອກ​ຜ່ານ​ບັນດາ​ບໍລິສັດ​ທີ່​ໄດ້​ຮັບ​ສິດໄປ​ກ່ອນ ເຖິງ​ຢ່າງ​ໃດ​ກໍ​ຕາມ, ທາງ​ກົມ ຈະ​ສືບຕໍ່ຄົ້ນ ​ຄວ້າ ແລະ ປະ​ເມີນ​ຜົນ​ລະບົບ​ ສຸຂາ​ນາ​ໄມ ຂອງ​ບັນດາ​ບໍລິສັດ​ສົ່ງ​ອອກ​ທີ່​ມີ​ເງື່ອນໄຂ​ສົ່ງ​ອອກ​ພືດ​ຕ່າງໆ​ ລວມ​ທັງ​ມັນ​ດ້າງ ແລ້ວ​ແຈ້ງ​ລາຍ​ຊື່​ໃຫ້​ອົງການ GACC ຂອງ ສປ ຈີນ ຮັບຊາບ; ຜູ້​ປະກອບ​ການຕ້ອງ​ເພີ່ມ​ທະວີ​ສ້າງ​ຄວາມ​ເຂົ້າໃຈ​ບັນດາ​ນິຕິ​ກໍາ ແລະ ຄວາມ​ຮູ້​ດ້ານ​ວິຊາ​ການ ທີ່​ຕິດ​ພັນ​ກັບ​ວຽກ​ງານ​ສຸຂາ​ນາ​ໄມ​ພືດ ແລະ ເງື່ອນໄຂ​ຕ່າງໆ ໃນ​ການ​ສົ່ງ​ອອກ ຕາມ​ອະ​ນຸ​ສັນຍາ​ທີ່ ສປປ ລາວ ໄດ້​ເຊັນ​ລົງ​ນາມ​ຮ່ວມ​ກັບ ສປ ຈີນ; ສໍາ​ລັບ​ການ​ນໍາ​ເຂົ້າ​ມັນ​ດ້າງ ຈາກ ສສ ຫວຽດນາມ ເຂົ້າ​ມາ​ດັດແປງເປັນຜະ​ລິດຕະພັນ ​ລາວ ແລ້ວ​ສົ່ງ​ໄປ ສປ ຈີນ ສາ ມາດ​ເຮັດ​ໄດ້ ໂດຍ​ການ​ຢັ້ງຢືນ​ສຸຂາ​ນາ​ໄມ​ພືດ​ໃນ​ຮູບ​ແບບ​ການ​ນໍາ​ເຂົ້າ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)