ທະນາຄານ​ການ​ຄ້າ ມະຫາຊົນ ສາຂາ ແຂວງອັດ​ຕະ​ປື ໄດ້​ຈັດ​ພິທີ​ມອບ​-​ຮັບ​ການ​ຍ້ອງຍໍ​ສັນລະເສີນ​ຜົນງານ​ດີເດັ່ນ​ໃນ​ການ​ປະກອບສ່ວນ​ດ້ານ​ທຶນຮອນ ວັດຖຸ​ປັດໄຈ​ຊ່ວຍເຫຼືອ​ຜູ້​ປະສົບ​ໄພ​ພິ​ບັດ ຄູ​ກັນ​ນ້ຳ​ເຂື່ອນ​ເຊ​ປຽນ​-​ເຊ​ນຳ້​ນ້ອຍ​ແຕກ​ຢູ່​ເມືອງສະ ໜາມ​ໄຊ ຂຶ້ນ​ເມື່ອ​ບໍ່​ດົນ​ມາ​ນີ້  ທີ່​ແຂວງ​ດັ່ງກ່າວ ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ ທ່ານ ອຸ່ນ​ຫຼ້າ ໄຊ​ຍະ​ສິດ ຮອງ​ເຈົ້າແຂວງ, ມີ​ບັນດາ​ທ່ານ​ຈາກ​ຂະແໜງການ​ກ່ຽວຂ້ອງ ຕະຫຼອດ​ຮອດ ພະນັກງານ​ຜູ້​ມີ​ຜົນງານ​ພາຍ​ໃນ​ທະນາຄານ​ການ​ຄ້າ​ເຂົ້າ​ຮ່ວມ.

ໃນ​ພິທີ ໄດ້​ຜ່ານ​ລັດ​ຖະ​ດຳລັດ ຂອງ​ປະທານ​ປະເທດ ເລກ​ທີ 043/ປປທ ລົງ​ວັນ​ທີ 12 ກຸມພາ 2020 ວ່າ​ດ້ວຍ​ການ​ມອບ​ຫຼຽນ​ໄຊ​ແຮງ​ງານ​ຊັ້ນ II ໃຫ້​ກົມ​ກອງ​ທະນາ​ຄານ​ການ​ຄ້າ​ຕ່າງປະເທດ​ລາວ​ມະຫາຊົນ ສາຂາ ແຂວງອັດ​ຕະ​ປື, ລັດ​ຖະ​ດຳລັດ ຂອງ​ປະທານ​ປະເທດ ເລກ​ທີ 111/ປປທ ລົງ​ວັນ​ທີ 8 ກໍລະກົດ 2020 ວ່າ​ດ້ວຍ​ການ​ປະດັບ​ຫຼຽນ​ໄຊ​ແຮງ​ງານ ຊັ້ນ II ແລະ ຊັ້ນ III ໃຫ້​ແກ່​ພະນັກງານ ຜູ້​ທີ່ມີ​ຜົນງານ​ດີ​ເດັ່ນ. ໃນ​ນີ້, ປະດັບ​ຫຼຽນ​ໄຊ​ແຮງ​ງານ​ຊັ້ນ II  ມີ 9 ທ່ານ ແລະ ຫຼຽນ​ໄຊ​ແຮງ​ງານ ຊັ້ນ III ຈຳນວນ 7 ທ່ານ, ຜ່ານ​ດຳລັດ​ຂອງ​​ນາຍົກ​ລັດຖະມົນຕີ ເລກ​ທີ 371/ນຍ ລົງ​ວັນ​ທີ 29/6/2020 ວ່າ​ດ້ວຍ​ການ​ປະດັບ​  ຫຼຽນ​ກາ​ແຮງ​ງານໃຫ້​ພະນັກງານ ຈຳນວນ 12 ທ່ານ ແລະ ຜ່ານ​ດຳລັດ​ຂອງ​ນາຍົກ​ລັດຖະມົນຕີ ເລກ​ທີ 370/ນຍ ລົງ​ວັນ​ທີ 29/6/2020 ວ່າ​ດ້ວຍ​ການ​ມອບ​ໃບ​ຍ້ອງຍໍ​ລັດຖະບານ​ໃຫ້​ ພະນັກງານ ຈຳນວນ 37 ທ່ານທີ່​ມີ​ ຜົນງານຄຸນງາມຄວາມດີ​ປະກອບ ສ່ວນ​ດ້ານ​ເຫື່ອແຮງ ແລະ ສະຕິປັນຍາ​ເຂົ້າ​ໃນ​ການ​ຊ່ວຍເຫຼືອ​ໄພພິບັດ​ຄູ​ກັນ​ນ້ຳ​ເຂື່ອນ​ເຊ​ປຽນ​-​ເຊ​ນ້ຳ​ນ້ອຍ​ແຕກ ໃນ​ປີ 2018 ຜ່ານ​ມາ ຢູ່​ເມືອງ ສະໜາມ​ໄຊ, ເປັນ​ກຽດ​ຂຶ້ນ​ປະດັບ​ຫຼຽນ ແລະ  ມອບ​ໃບ​ຍ້ອງຍໍຄັ້ງ​ນີ້ ໂດຍ​ແມ່ນ​ທ່ານຮອງ​ເຈົ້າແຂວງອັດ​ຕະ​ປື.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)