ກອງ​ປະຊຸມ​ໃຫຍ່​ສະຫະ ພັນ​ແມ່ຍິງ​ຄະນະ​ພົວພັນ​ຕ່າງ ປະເທດ​ສູນ​ກາງ​ພັກ (ຄຕພ) ຄັ້ງ​ທີ 1 ໄດ້​ເປີດຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 19 ສິງຫາ ນີ້ ທີ່ສໍາ​ນັກ​ງານ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ສະຫາຍ ນາງ ສູນ​ທອນ ໄຊ​ຍະ​ຈັກ ກໍາ​ມະ​ການ​ສູນ​ກາງ​ພັກ ເລຂາ​ຄະນະ​ພັກ ຫົວໜ້າ ຄະນະ​ພົວພັນ​ຕ່າງປະເທດ​ສູນ​ກາງ​ພັກ, ສະຫາຍ ນາງ ບັນດິດ ປະທຸມ​ວັນ  ຮອງ​ປະທານ​ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ, ມີ​ພາກສ່ວນ​ກ່ຽວ ຂ້ອງ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້​ໄດ້​ຮັບ​ຟັງ​ບົດ​ລາຍ​ງານ​ການເມືອງ ຂອງ​ຄະນະ​ບໍລິຫານ​ງານ​ສະ ຫະພັນ​ແມ່ຍິງ ຄະນະ​ພົວພັນ ຕ່າງປະເທດ​ສູນ​ກາງ​ພັກ​ໄລຍະ 4 ປີກວ່າ​ຜ່ານມາ ສະເໜີ​ໂດຍ ສະຫາຍ ນາງ ພອນ​ດາ​ວັນ ພີນ​ສະຫວັນ ປະທານ​ສະຫະພັນ ແມ່ຍິງ ຄຕພ ໄດ້​ຕີ​ລາຄາ​ຢ່າງ​ເລິກເຊິ່ງ ແລະ ຮອບດ້ານ​ຕໍ່​ຜົນ​ສໍາ​ເລັດ​ໃນ​ການ​ຊີ້​ນໍາໆ​ພາ​ຂອງ ຄະນະ​ບໍລິຫານ​ງານ​ສະຫະພັນ​ແມ່ຍິງ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ​ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ (2016-2019). ພ້ອມ​ທັງ​ຜ່ານ​ບົດ​ສໍາ​ຫຼວດ​ການ​ນໍາ​ພາ​ຂອງ​ຄະນະ​ບໍລິຫານ​ງານ​ສະຫະພັນ​ແມ່ຍິງ ຄຕພ ຊຸດ​ເກົ່າ, ຕີ​ລາຄາ​ຈຸດ​ດີ, ຈຸດ​ອ່ອນ ແລະ ຂໍ້ຄົງຄ້າງ, ບົດຮຽນ​ທີ່​ຖອດ​ຖອນ​ໄດ້ ເພື່ອ​ປັບປຸງ​ແກ້​ໄຂ​ໃນຕໍ່ໜ້າ; ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ​ຕໍ່​ຜົນງານ​ການຈັດຕັ້ງ​ປະຕິບັດ ຂໍ້​ແຂ່ງຂັນ 3 ດີ ທີ່​ສາມາດ​ຍາດ​ໄດ້​ທຸງໄຊ ຊຶ່ງ​ໄດ້​ມີ​ພິທີ​ຮັບຮອງ​ໃນ​ເດືອນ​ກໍລະກົດ  ທີ່​ຜ່ານ​ມາ, ກອງ​ປະຊຸມ​ຍັງ​ໄດ້ ເປັນ​ເອກະ​ພາບ​ໃນ​ການ​ວາງ​ທິດ​ທາງ​ໜ້າທີ່​ຂອງ​ຄະນະ​ບໍລິຫານ​ງານ​ສະຫະພັນ​ແມ່ຍິງ ຄຕພ ໃນ​ໄລຍະ​ຕໍ່​ໜ້າ.

ກອງ​ປະຊຸມ​ໄດ້​ໃຊ້​ສິດ​ປະຊາທິປະໄຕ​ປ່ອນ​ບັດ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ສະຫະພັນ​ແມ່ຍິງ ຄະນະ​ພົວພັນ ຕ່າງປະເທດ​ສູນ​ກາງ​ພັກ​ຊຸດ​ໃໝ່ ຈໍາ​ນວນ 5 ສະຫາຍ ແລະ ໃນ​ນັ້ນ​ໄດ້​ເລືອກ​ເອົາ ສະຫາຍ ນາງ ສິ​ຣິ​ພອນ ຄູຫາ​ເທບ ເປັນ​ປະທານ, ສະຫາຍ ນາງ ຈັນທະ​ລາ ລັດ​ຖະ​ຈັກ ເປັນ​ຮອງ​ປະທານ, ສະ ຫາຍ ນາງ ພູ​ສີ ວົງ​ແພງ​ຄຳ ເປັນ​ຄະນະ. 

ສະຫາຍ ນາງ ສູນ​ທອນ ໄຊ​ຍະ​ຈັກ ແລະ ສະຫາຍ ສະຫາຍ ນາງ ບັນດິດ ປະທຸມ​ວັນ ໄດ້​ໃຫ້​ກຽດ​ໂອ້​ລົມ ພ້ອມ​ທັງ​ສະແດງ​ຄວາມ​ຊົມເຊີຍ​ຕໍ່​ບັນດາ​ຜົນ​ສໍາ​ເລັດ ກໍ​ຄືຜົນງານຂອງ​ຄະນະ​ບໍລິຫານ​ງານ​ສະຫະພັນ​ແມ່ຍິງ ຄຕພ ຍາດ​ມາ​ໄດ້​ໃນ​ໄລຍະ​ຜ່ານ​ມາ ແລະ ໃຫ້​ທິດ​ຊີ້​ນໍາ​ໃນ​ການເຄື່ອນໄຫວ​ໃນຕໍ່ໜ້າ ເພື່ອ​ເປັນ ເຂັມ​ຊີ້​ທິດ​ເຍືອງ​ທາງ ແລະ ເປັນ​ບ່ອນ​ອີງ​ທີ່​ສໍາ​ຄັນ ໃຫ້​ແກ່​ຄະນະ​ບໍລິຫານ​ງານ​ສະຫະພັນ​ແມ່ຍິງ​ຊຸດ​ໃໝ່​ ນໍາ​ໄປ​ຈັດ​ຕັ້ງ​ຜັນ​ຂະຫຍາຍ ເຂົ້າ​ໃນ​ການ​ຊີ້ນໍາໆ​ພາ​ວຽກ​ງານ​ແມ່ຍິງ ຂອງ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ ໃຫ້​ມີ​ຜົນ​ສໍາ​ເລັດ​ຫຼາຍ​ກວ່າ​ເກົ່າ ແລະ ສາມາດ​ເຮັດ​ສໍາ​ເລັດ​ໜ້າທີ່​ການເມືອງ​ໃນ​ໄລຍະ​ໃໝ່​ເປັນ​ຢ່າງ​ດີ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)