ກອງ​ປະຊຸມ​ໃຫຍ່ ສະຫະພັນ​ກຳມະບານ ຄະນະ​ໂຄສະນາ​ອົບຮົມ​ສູນ​ກາງ​ພັກ (ຄອສພ) ຄັ້ງ​ທີ VI ໄດ້​ຈັດ​ຂຶ້ນ ແລະ ສຳເລັດ​ຢ່າງ​ຈົບງາມ​ໃນ​ວັນ​ທີ 19 ສິງຫານີ້ ທີ່​ຫ້ອງ​ປະຊຸມ​ໃຫຍ່ ຄອສພ (ຫຼັກ 6) ໂດຍ​ການ​ເຂົ້າ​ຮ່ວມ​ຂອງ ສະຫາຍ ຄຳ​ພັນ ພົມ​ມະ​ທັດ ກຳມະການ​ກົມ​ການເມືອງ​ສູນ​ກາງ​ພັກ ຄະ ນະ​ເລຂາທິການ​ສູນ​ກາງ​ພັກ  ຫົວໜ້າ ຄອສພ, ມີ ສະຫາຍ ນາງ ອາລີ ວົງ​ໜໍ່​ບຸນ​ທຳ ຮອງ​ປະທານ​ຄະນະ​ບໍລິຫານ​ງານ ສະຫະພັນ​ກຳມະບານ​ລາວ, ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ສະຫາຍ ຄຳ​ເຄນ ຈັນທະວົງ ປະທານ​ຄະນະ​ບໍລິຫານ​ງານ​ສະຫະພັນ​ກຳມະບານ ອອສພ ໄດ້​ຂຶ້ນ​ຜ່ານ​ບົດ​ລາຍ​ງານ​ການເມືອງ ໂດຍ​ໄດ້​ຕີ​ລາຄາ​ຜົນ​ການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ V ຂອງ​ສະຫະພັນ​ກຳມະບານ​ຄະນະ​ໂຄສະນາ​ອົບຮົມ​ສູນ​ກາງ​ພັກ ແຕ່​ປີ 2015-2019 ໄດ້​ຮັບ​ຜົນສຳເລັດ​ຫຼາຍ​ດ້ານ ໂດຍ​ສະເພາະ​ດ້ານ​ການ​ສຶກສາ​ອົບຮົມ​ການ​ເມືອງ​-​ແນວ​ຄິດ ສາມາດ​ເຮັດ​ໃຫ້​ພະນັກ​ງານ​-​ສະມາຊິກ​ກຳມະບານ​ມີ​ແນວ​ຄິດ​ຫຼັກ​ໝັ້ນ​ການເມືອງ​ໜັກ​ແໜ້ນ, ມີ​ຄວາມ​ເຊື່ອ​ໝັ້ນ​ຕໍ່​ການ​ນຳພາ​ຂອງ​ພັກ, ມີ​ຄວາມ​ສາມັກຄີ​ເປັນ​ປຶກ​ແຜນ, ມີ​ຄວາມ​ຮັບຜິດຊອບ​ສູງ ແລະ ເປັນ​ເຈົ້າ​ການ​ເຮັດ​ສຳເລັດ​ທຸກ​ໜ້າທີ່​ວຽກ​ງານ​ທີ່​ການຈັດຕັ້ງ​ມອບ​ໝາຍ​ໃຫ້, ປະກອບສ່ວນ​ອັນ​ສໍາ​ຄັນ​ເຂົ້າ​ໃນ​ພາລະກິດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ ກໍ​ຄືພັດທະນາ​ອົງກອນ​ຂອງ​ຕົນ​ເອງ.

ຈາກ​ນັ້ນ​ກອງ​ປະຊຸມ ຍັງ​ໄດ້​ຜ່ານ​ແຜນ​ຍຸດທະສາດ​ພັດທະນາ​ວຽກ​ງານ​ກຳມະບານ ຄອສພ ໄລຍະ 5 ປີ (2020 – 2024) ແລະ ວິໄສ​ທັດ 10 ປີ (2020 – 2030), ຜ່ານ​ບົດ​ສຳຫຼວດ​ການ​ນຳພາ​ຂອງ​ຄະນະ​ບໍລິຫານ​ງານ ສະຫະພັນ​ກຳມະບານ ຄອສພ. ກອງ​ປະຊຸມ​ໃຫຍ່​ຄັ້ງ​ນີ້ ໄດ້​ປ່ອນ​ບັດ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ ສະຫະພັນ​ກຳມະບານ ຄອສພ ຊຸດ​ໃໝ່ ມີ 7 ສະຫາຍ, ຍິງ 2 ສະຫາຍ, ກອງ​ປະຊຸມ​ຄັ້ງ​ປະຖົມ​ມະລືກ​ໄດ້​ເລືອກ​ເອົາ ​ສະຫາຍ ວັນ​ຕຸລາ ຣັກ​ນຸດ ເປັນ​ປະທານ​ສະຫະພັນ​ກຳມະບານ ຄອສພ, ສະຫາຍ ນາງ ໄພ​ວັນ ວັນນະ​ໄຊ ເປັນ​ຮອງ​ປະທານ ທັງ​ເປັນ​ປະທານ​ກວດກາ ແລະ ສະຫາຍ ວັນ​ລາຕີ ຄໍາ​ວານ​ວົງສາ ເປັນ​ຮອງ​ປະ​ທານ.

ໂອກາດ​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້ ສະຫາຍ ຄຳ​ພັນ ພົມ​ມະ​ທັດ ໄດ້​ກ່າວ​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ​ທີ່​ກຳມະບານ ຄອສພ ຍາດ​ມາ​ໄດ້, ພ້ອມ​ທັງ​ໄດ້​ມີ​ຄຳ​ເຫັນ​ໂອ້​ລົມ ເພື່ອ​ຊີ້​ທິດ​ເຍືອງ​ທາງ​ໃຫ້​ແກ່ ຄະນະ​ບໍລິຫານ​ງານ​ສະຫະພັນ​ກຳມະບານ ຄອສພ ຊຸດ​ໃໝ່ ໃນ​ການ​ສືບຕໍ່​ຊີ້​ນໍາ-​ນຳພາ​ຮອບດ້ານ ເພື່ອ​ຈະ​ນຳພາ​ສະມາຊິກ​ກຳມະບານ ໃນ ຄອສພ ເຮັດ​ສໍາ​ເລັດ​ຕາມ​ແຜນການ​ທີ່​ວາງ​ໄວ້.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)