ສປປ ລາວ ໄດ້​ເປັນ​ເຈົ້າ ພາບ​ຈັດ​ກອງ​ປະຊຸມ​ຜູ້​ນໍາ​ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ຄັ້ງ​ທີ 3 ໃນ​ຮູບ​ແບບ​ກອງ​ປະຊຸມ​ທາງໄກ ໂດຍ​ການ​ເປັນ​ປະທານ​ຮ່ວມ​ຂອງ ພະນະ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ສປປ ລາວ ແລະ ພະນະ​ທ່ານ ຫຼີ ເຄີ້​ສຽງ ນາຍົກລັດຖະມົນຕີ ແຫ່ງ ສປ ຈີນ, ພາຍ​ໃຕ້​ຄໍາ​ຂວັນ “ເພີ່ມ ທະວີ​ການ​ຮ່ວມ​ມື ເພື່ອຄວາມ ​ສົມບູນ​ພູນ​ສຸກ​ຮ່ວມ​ກັນ” (Enhancing Partnership for Shared Prosperity) ຂຶ້ນ​ໃນ​ຕອນ​ເຊົ້າ​ວັນ​ທີ 24 ສິງຫາ 2020.

ກອງ​ປະຊຸມ​ຄັ້ງ​ນີ້ ບັນດາ​ຜູ້​ນໍາ​ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ທັງ 6 ປະເທດ​ລວມ​ມີ ກຳປູເຈຍ, ສປ ຈີນ, ສປປ ລາວ, ມຽນມາ, ໄທ ແລະ ຫວຽດນາມ ໄດ້​ທົບ ​ທວນຄືນ​ໝາກຜົນ​ຂອງ​ການ​ຮ່ວມ​ມື​ໃນ​ໄລຍະ 5 ປີ ຜ່ານ​ມາ​ນັບ​ແຕ່​ໄດ້​ຮັບ​ການ​ສ້າງ​ຂຶ້ນ​ໃນ​ປີ 2015 ຊຶ່ງ​ເຫັນ​ວ່າ​ຜ່ານ​ການຈັດຕັ້ງ​ບັນດາ​ແຜນ​ງານ ແລະ ໂຄງການ​ຕ່າງໆ​ພາຍ​ໃຕ້​ຖະແຫຼງການ​ຊັນ​ຍາ, ຖະແຫຼງການ​ພະນົມ​ເປັນ ທີ່​ໄດ້​ຮັບຮອງ​ເອົາ​ຢູ່​ໃນ​ກອງ​ປະຊຸມ​ຜູ້​ນໍາ​ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ຄັ້ງ​ທີ 1 ແລະ ຄັ້ງ​ທີ 2 ໄດ້​ມີ​ຄວາມ​ຄືບ​ໜ້າ​ຢ່າງ​ເປັນ​ຮູບ​ປະ​ທຳ​ ຫຼາຍ​ດ້ານ​ເຮັດ​ໃຫ້​ຂອບ​ການ​ຮ່ວມ​ມື​ດັ່ງກ່າວ​ໄດ້​ເຕີບ​ໃຫຍ່​ຂະຫຍາຍ​ສູ່​ລວງ​ກວ້າງ ແລະ ລວງ​ເລິກ ຢ່າງ​ໄວ​ວາ.

ພ້ອມ​ດຽວ​ກັນ​ນັ້ນ, ບັນດາ​ຜູ້ນຳ ໄດ້​ ຕີ​ລາຄາ​ສູງ​ຕໍ່​ໝາກຜົນ​ການ ຈັດຕັ້ງ​ປະຕິບັດ​ແຜນ​ປະຕິບັດ​ງານ 5 ປີ ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ (2018-2022) ໃນ​ໄລຍະ 2 ປີ​ກ່​ວາ​ຜ່ານ​ມາ ກໍຄື​ບັນດາ​ໂຄງການ​ຊ່ວຍເຫຼືອ​ພາຍ​ໃຕ້​ກອງ​ທຶນ​ພິເສດ​ແມ່​ນໍ້າ​ຂອງ​-​ແມ່​ນໍ້າ​ລ້າງ​ຊ້າງ ທີ່​ໄດ້​ຮັບ​ການ​ສະໜັບສະໜູນ​ທຶນ​ຈາກ ສປ ຈີນ ຈໍາ​ນວນ 300 ລ້ານ​ໂດ​ລາ​ ຊຶ່ງ​ໄດ້​ປະກອບສ່ວນ​ຢ່າງ​ຕັ້ງ​ໜ້າ​ເຂົ້າ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ ຢູ່​ພາກ​ພື້ນ​ແມ່​ນໍ້າ​ຂອງ. ໃນ​ນີ້, ຫຼາຍ​ໂຄງການ​ທີ່​ໄດ້​ຈັດ​ຕັ້ງ​ປະຕິບັດ​ຢູ່ ສປປ ລາວ ແມ່ນ​ໄດ້​ຮັບ​ຜົນ​ເປັນ​ຢ່າງ​ດີ​ເປັນຕົ້ນ​ແມ່ນ​ໃນ​ຂົງເຂດ​ການ​ພັດທະນາ​ພື້ນຖານ​ໂຄງ​ລ່າງ, ພັດທະນາ​ຊົນນະບົດ ແລະ ການ​ລຶບລ້າງ​ຄວາມທຸກ​ຍາກ.
ໃນ​ໂອກາດ​ດຽວ​ກັນ​ນີ້, ບັນດາ​ຜູ້ນຳ​ຍັງ​ໄດ້​ແລກປ່ຽນ​ຄຳ​ຄິດ​ຄຳ​ເຫັນ ແລະ ປຶກສາ​ຫາລື ທິດ​ທາງ​ການ​ຮ່ວມ​ມື​ໃນຕໍ່​ໜ້າ​​ຫຼາຍ​ບັນຫາ, ໜຶ່ງ​ໃນ​ນັ້ນ​ແມ່ນ​ການ​ເພີ່ມ​ທະວີ​ຮ່ວມ​ມື​ກັນ​ໃນຕໍ່ຫນ້າ​ເພື່ອ​ຕໍ່ສູ້​ກັບ​ພະຍາດ​ໂຄ​ວິດ-19 ແລະ ວາງ​ທິດ​ທາງ​ ຟື້ນ​ຟູ​ເສດ​ຖະ​ກິດ​-​ສັງຄົມ ຕໍ່ໜ້າ​ສະພາບ​ທີ່​ພະຍາດ​ຮ້າຍ​ແຮງ​ດັ່ງກ່າວ​ຍັງ​ສືບຕໍ່​ແຜ່​ລະບາດ​ຢູ່​ຫຼາຍ​ພາກ​ພື້ນ​ລວມ​ທັງ​ພາກ​ພື້ນ​ແມ່​ນໍ້າ​ຂອງ ພ້ອມ​ດຽວກັນ ນີ້, ກໍ​ໄດ້​ສະແດງ​ຄວາມ​ຊົມ ເຊີຍຕໍ່​ປະເທດ​ສະມາຊິກ ທີ່​ໄດ້​ດໍາ​ເນີນ​ມາດ​ຕະການ​ສະກັດ​ກັ້ນ ແລະ ຄວບ​ຄຸມ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ໄດ້​ຢ່າງ​ທັນ​ການ ແລະ ມີ​ປະສິດ​ທິ​ຜົນ, ພ້ອມ​ທັງ​ສະແດງ​ຄວາມ​ຂອບໃຈ ຕໍ່ ສປ ຈີນ ທີ່​ໄດ້​ ໃຫ້ການ​ຮ່ວມ​ມື ແລະ ການ​ສະ ໜັບສະໜູນ​ດ້ານ​ອຸປະກອນ ແລະ ວິຊາ​ການ​ໃຫ້​ແກ່​ບັນດາ​ປະເທດ​ແມ່​ນໍ້າ​ຂອງ ລວມ​ທັງ ສປປ ລາວ.

ກອງ​ປະຊຸມ​ຄັ້ງ​ນີ້​ໄດ້​ຮັບ ຮອງ​ເອົາ​ຖະແຫຼງການ​ວຽງ​ຈັນ (Vientiane Declaration) ແລະ ເອກະສານ​ກ່ຽວ​ຂ້ອງ​ຈໍາ​ນວນ​ໜຶ່ງ ເພື່ອ​ເປັນ​ບ່ອນ​ອີງ​ສຳຄັນ​ໃຫ້​ແກ່​ການ​ຮ່ວມ​ມື​ລະຫວ່າງ​ປະເທດ​ແມ່​ນໍ້າ​ຂອງ ແລະ ສປ ຈີນ ກໍຄື​ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ​ໃນ​ອະ​ນາ​ຄົດ. ໃນ​ຕອນ​ທ້າຍ​ຂອງ​ກອງ​ປະຊຸມ, ບັນດາ​ຜູ້ນຳ​ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ຢ່າງ​ຈົບງາມ​ໃນ​ການ​ປະຕິບັດ​ໜ້າທີ່​ການ​ເປັນ​ປະທານ​ຮ່ວມ​ຂອງ ສປປ ລາວ (2018-2020) ແລະ ໄດ້​ສົ່ງ​ມອບ​ໜ້າທີ່​ໃຫ້ ສສ.ມຽນ​ມາ ເພື່ອ​ສືບຕໍ່​ເປັນ​ປະທານ​ຮ່ວມ ກັບ ສປ ຈີນ ໃນ​ໄລຍະ 2 ປີ​ຂ້າງ​ໜ້າ.

ຂ່າວ : ກົມ​ເສດຖະກິດ, ກະຊວງ​ການ​ຕ່າງປະເທດ