ຈຳນວນ 6 ແຂວງ, 37 ເມືອງ 788 ບ້ານ ທີ່ຖືກຜົນກະທົບຈາກອິດທິຜົນຂອງພະຍຸເຂດຮ້ອນ ໂພດູ ແລະ ພາຍຸດີເປຣຊັນ ພັດເຂົ້າລາວເຮັດໃຫ້ນ້ຳຖ້ວມແຕ່ທ້າຍເດືອນສິງຫາມາຮອດຂະ ນະນີ້ ລັດຖະບານ ກໍຄືກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມໄດ້ ອະນຸມັດງົບສຸກເສີນໃຫ້ແຂວງລະ 50 ລ້ານກີບ ພ້ອມຈັດສົ່ງເຄື່ອງໃຊ້ຈຳເປັນໄປຍັງບັນດາ ແຂວງທີ່ໄດ້ຮັບຜົນກະທົບດັ່ງກ່າວ.

ຕາມຂໍ້ມູນຂອງກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ ທີ່ໄດ້ເຮັດ ໜັງສືລາຍງານຕໍ່ລັດຖະບານ ສະບັບເລກທີ 1236/ສສຄ, ລົງວັນທີ 5 ກັນຍາ 2019 ຮູ້ວ່າ: ນັບແຕ່ທ້າຍເດືອນສິງຫາ ຫາ ຕົ້ນເດືອນກັນຍາ 2019 ໄດ້ມີພາຍຸພັດຜ່ານເຂົ້າລາວ ແລະ ເຮັດໃຫ້ມີຝົນຕົກໜັກນ້ຳຖ້ວມຢູ່ 6 ແຂວງຄ: ຄຳມ່ວນ, ສະຫວັນນະເຂດ, ຈຳປາສັກ, ສາລະ ວັນ, ເຊກອງ ແລະ ອັດຕະປື ສົ່ງຜົນກະທົບໂດຍກົງຕໍ່ປະຊາຊົນຈຳນວນ 37 ເມືອງ, 788 ບ້ານ, 54,20 ພັນຄອບຄົວ ແລະ ເສຍຊີວິດ 2 ຄົນ, ສູນຫາຍ 2 ຄົນ, ປະຊາຊົນຍົກຍ້າຍ 3,4 ພັນຄອບຄົວ, ສ້າງຄວາມເສຍຫາຍຕໍ່ບ້ານເຮືອນປະຊາຊົນ, ເນື້ອທີ່ນາຖືກນ້ຳຖ້ວມ 1,30 ແສນຮັກຕາ, ສວນ 251 ເຮັກຕາ, ໜອງປາ 953 ໜອງ, ຊົນລະປະທານ 26 ແຫ່ງ, ເສັ້ນທາງ ຖືກນ້ຳຖ້ວມ 139 ກິໂລແມັດ, ຂົວ 6 ແຫ່ງ, ໂຮງຮຽນ 45 ແຫ່ງ, ສຸກສາລາ 2 ແຫ່ງ ແລະ ສັດ ລ້ຽງຫຼາຍກວ່າ 136 ໂຕຖືກຍ້າຍໄປຢູ່ທີ່ປອດໄພ.

ປະຈຸບັນ ຄວາມຕ້ອງການອັນຮີບຮ້ອນດ່ວນ ລວມມີເຄື່ອງອຸປະໂພກ-ບໍລິໂພກ ເປັນຕົ້ນ ແມ່ນ: ເຂົ້າ, ອາຫານ, ນ້ຳດື່ມ, ເຄື່ອງນຸ່ງ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້ອື່ນໆ. ເຊິ່ງປະຈຸບັນ ທາງກົມສັງຄົມສົງເຄາະ ແມ່ນໄດ້ຈັດສົ່ງໃຫ້ແລ້ວ ພ້ອມດ້ວຍງົບປະມານຮັບໃຊ້ສຸກເສີນ ແຂວງລະ 50 ລ້ານກີບ.