ທ່ານ ສອນໄຊ ສີພັນດອນ ຢ້ຽມຢາມ ເຂດເສດຖະກິດ ນິຄົມອຸດສາຫະກຳ ແລະ ການຄ້າ ວຽງຈັນໂນນທອງ

0
89

ທ່ານ ສອນ​ໄຊ ສີ​ພັນດອນ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ແຜນການ​ແລະ​ການ​ລົງທຶນ (ກຜທ) ພ້ອມ​ດ້ວຍ​ຄະນະ ໄດ້​ລົງ​ຢ້ຽມຢາມ ແລະ ຊຸກຍູ້​ການ​ພັດທະນາເຂດ​ເສດຖະກິດ​ນິຄົມ​ອຸດສາຫະກຳ ແລະ ການ​ຄ້າ ວຽງ​ຈັນ​ໂນນທອງ ນະຄອນຫຼວງ​ວຽງ​ຈັນເມື່ອບໍ່​ດົນ​ມານີ້, ໃນ​ໂອກາດ​ລົງ​ຢ້ຽມຢາມ​ຄັ້ງ​ນີ້ ທ່ານ​ ທອງ​ທິບ ພັນ​ນຸ​ລາດ ຮັກສາການປະທານສະພາ​ບໍລິຫານເຂດ VITA PARK ໄດ້​ລາຍ​ງານວ່າ: ເຂດ​ດັ່ງກ່າວ ມີ​ເນື້ອທີ່ 110 ເຮັກຕາ ແລະ ໄດ້​ສ້າງຕັ້ງ​ຂຶ້ນ ໃນ​ປີ 2010 ພາຍ​ໃຕ້​ສັນຍາຮ່ວມ​ມື​ພັດທະ ນາ ລະຫວ່າງ​ ລັດຖະບານ​ແຫ່ງ ສປປ ລາວ (ຕາງໜ້າ​ໂດຍ​ກະ ຊວງ ​ອຸດສາຫະກຳ ແລະ ການ​ຄ້າ) ແລະ ຜູ້​ພັດທະນາ ຈາກ ໄຕ້​ຫວັນ ສປ ຈີນ (ບໍລິສັດ ໝຳເວ​ພັດທະນາ ຈຳກັດ). ມາຮອດ​ປັດຈຸບັນ ໄດ້​ອະນຸມັດ ການ​ລົງທຶນ​ໃຫ້ 67 ບໍ​ລິ​ສັັດ ຊຶ່ງ​ມີ​ທຶນ​ຈົດ​ທະບຽນ 72 ລ້ານກວ່າ​ໂດ​ລາ​, ໃນ​ນັ້ນ 32 ບໍລິສັດ ໄດ້​ດໍາ​ເນີນ​ການ​ຜະລິດ ແລະ ສົ່ງອອກ​ສິນຄ້າຫຼາຍ​ກວ່າ 206 ລ້ານໂດ​ລາ. ນັກ​ລົງ​ທຶນ​ຕ່າງປະເທດ​ມາ​ຈາກສປ ຈີນ, ຍີ່ປຸ່ນ, ໄທ, ໄຕ້​ຫວັນ, ຮົງ​ກົງ ແລະ ເດນ​ມາກ. ສິນຄ້າ​ສົ່ງ​ອອກ​ຕົ້ນຕໍ​ແມ່ນ ເຄື່ອງນຸ່ງ​ຫົ່ມ, ຊິ້ນ​ສ່ວນ​ອຸປະກອນ​ເອ​ເລັກ​ໂຕ​ຣນິກ, ສາຍ​ໄຟ​ສຳລັບ​ປະ​ກອບ​ນຳ້​ອຸ່ນ, ສາຍ​ໄຟ​ແອ​ເຢັນ, ທູບ​ຈອດ, ເຄື່ອງມືອຸປະກັອນການ ​ຜະລິດ​ເຕັກນິກ ແລະ ຜະ ລິດ​ຕະ​ພັນ​ປຸງ​ແຕ່ງອາຫານ​ອື່ນໆ. ເຂດ VITA PARK ໄດ້ ສ້າງ​ວຽກ​ເຮັດ​ງານ​ທຳ​ໃຫ້​ປະຊາຊົນ​ອ້ອມ​ຂ້າງ 3.500 ກວ່າຄົນ (ໃນ​ນັ້ນ​ຕ່າງປະເທດ 85 ຄົນ) ແລະ ຄາດ​ວ່າ​ໃນ​ປີ 2021 ຈະ​ສາມາດ​ສ້າງ​ວຽກ​ເຮັດ​ງານ​ທໍາ​ໃຫ້​ປະຊາຊົນ​ລາວ​ໄດ້ 4.000-5.000 ຄົນ ແລະ ໄດ້​ມອບ​ພັນ ທະ​ອາກອນ 2 ຕື້​ກວ່າ​ກີບ ໃຫ້​ແກ່ ນະຄອນຫຼວງ​ວຽງ​ຈັນ (ປີ 2019) ແລະ ໄດ້​ປະກອບສ່ວນ​ໃນ​ການ​ປັບປຸງ​ພື້ນຖານ​ໂຄງ​ລ່າງ ແລະ ສິ່ງ​ອຳນວຍ​ຄວາມ​ສະດວກ​ ເຊັ່ນ: ນໍ້າ​ປະປາ ແລະ ໄຟ ຟ້າ. ໃນ​ອະນາຄົດ​ເຂດ VITA PARK ມີ​ແຜນພັດທະນາ​ໂຄງການ ໄລຍະ​ທີ 2 ໃນ​ເນື້ອທີ່ 142 ຮຕ.
ທ່ານ ສອນ​ໄຊ ສີ​ພັນດອນ ໄດ້​ສະແດງ​ຄວາມ​ຍ້ອງຍໍ​ຊົມ ເຊີຍ​ມາ​ຍັງ​ຄະນະ​ສະພາ​ບໍລິ ຫານ ເຂ​ດ​ເສດຖະກິດ​ນິຄົມ​ ອຸດສາຫະກຳ ແລະ ການຄ້າ​ ວຽງ​ຈັນ​ໂນນ​ທອງ ທີ່​ໄດ້​ປະ ກອບສ່ວນ​ອັນ​ສຳຄັນ​ເຂົ້າ​ໃນ​ການ​ສ້າງ​ວຽກ​ເຮັດ​ງານ​ທຳ​ຂອງ​ປະຊາຊົນ ທີ່​ສຳຄັນ​ເປັນ​ເຂດ 1 ໃນ 12 ເຂດ​ເສດຖະກິດທີ່​ ມີ​ການ​ພັດທະນາ​ດີ ແລະ ສາ ມາດ​ດຶງ​ດູດ​ການ​ລົງທຶນຂອງ​ ຕ່າງປະເທດ​ເຂົ້າ​ມາ​ເຂດ​ດັ່ງ ກ່າວ​ນັບ​ມື້​ນັບ​ຫຼາຍ​ຂຶ້ນ. ທ່ານ​ຮອງ​ນາຍົກ ໄດ້​ເນັັ້ນ​ໜັກ​ໃຫ້ ເອົາໃຈໃສ່​ການ​ພັດທະນາ​ທີ່​ທັນ​ສະໄໝ​ແຕ່​ໃຫ້​ເປັນ​ມິດ​ ກັບ​ສິ່ງແວດລ້ອມ ໂດຍ​ສະເພາະ​ໃຫ້​ເນັ້ນ​ໃສ່​ອຸດສາຫະກຳ​ສີຂຽວ ຕາມ​ທິດ​ການ​ພັດທະນາ​ແບບ​ຍືນ​ຍົງ.