ໃນວັນທີ 25 ສິງຫາ 2020, ໄດ້ຈັດຝຶກອົບຮົມຄວາມພື້ນຖານ ກ່ຽວກັບພະຍາດວໍ້ ໃຫ້ບັນດານັກຂ່າວ ສື່ມວນຊົນ ໃນວັນທີ 25-26 ສິງຫາ 2020 ທີ່ຫ້ອງປະຊຸມສະໂມສອນເຂື່ອນໄຟຟ້ານ້ຳງື່ມ I, ທ່າລາດ, ແຂວງວຽງຈັນ.

ໂດຍການເປັນປະທານຂອງ ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ພ້ອມດ້ວຍ ພະນັກງານວິຊາການຈາກກົມຄວບຄຸມພະຍາດຕິດຕໍ່, ມີບັນດານັກຂ່າວຈາກສູນກາງ ແລະ ທ້ອງຖິ່ນ (ນະຄອນຫຼວງວຽງຈັນ, ແຂວງວຽງຈັນ, ແຂວງບໍລິຄຳໄຊ ແລະ ແຂວງໄຊຍະບູລີ) ເຂົ້າຮ່ວມ.

ຈຸດປະສົງຂອງການຝຶກອົບຮົມຄັ້ງນີ້ ແມ່ນປຶກສາຫາລືເພື່ອຫາວິທີການສຸມໃສ່ໂຄສະນາ ຜົນຮ້າຍ, ການຄວບຄຸມ ແລະ ຕ້ານພະຍາດວໍ້ ຈາກສັດສູ່ຄົນ ລົງສູ່ຊຸມຊົນຢ່າງທົ່ວເຖິງ, ພ້ອມທັງ ໃຫ້ຮູ້ເຖິງຄວາມເປັນມາຂອງວັກຊິນກັນພະຍາດວໍ້ ແລະ ການຊັກວັກຊິນປ້ອງກັນພະຍາດດັ່ງກ່າວ.

ພະຍາດວໍ້ ເປັນເຊື້ອຈຸລະໂລກ ທີ່ອາໄສຢູ່ໃນນ້ຳລາຍຂອງສັດລ້ຽງລູກດ້ວຍນ້ຳນົມ, ເປັນພະຍາດທີ່ຮ້າຍແຮງ ຖ້າຖືກສັດທີ່ມີເຊື້ອພະຍາດ ກັກ, ຂູດ…ຖ້າບໍ່ໄດ້ຮັບການຊັກວັກຊິນປ້ອງກັນ ຈະເຮັດໃຫ້ເສຍຊີວິດ ທັງສັດ ທັງຄົນ. ເຊື້ອພະຍາດວໍ້ ເຂົ້າສູ່ຮ່າງກາຍໄດ້ໂດຍຜ່ານບາດແຜຂອງຜິວໜັງ ເຊັ່ນ: ຮອດກັດ, ຮອຍຂູດ…ນອກຈາກນີ້, ຍັງສາມາດເຂົ້າຜ່ານລະບົບຫາຍໃຈ, ລະບົບເສັ້ນປະສາດ ການເຄື່ອນທີ່ຂອງພະຍາດໃນລະບົບຮ່າງກາຍ ແມ່ນ: 12-24 ຊມ/ວັນ, ລະບົບເຊື້ອພະຍາດທີ່ຝັງໂຕໃນຮ່າງກາຍ ປະມານ 20-90 ວັນ ຫຼື ອາດດົນເຖິງ 8 ປີ.

ພະຍາດວໍ້ ເປັນພະຍາດບູລິມະສິດໜຶ່ງຢູ່ໃນແຜນຍຸດທະສາດ 2011-2015 ກ່ຽວກັບ ການຕິດເຊື້ອພາຍໃຕ້ການຮ່ວມມື 2 ກະຊວງ ຄື: ກະຊວງສາທາລະນະສຸກ ແລະ ກະຊວງກະສິກຳ-ປ່າໄມ້ ທີ່ໄດ້ຮ່ວມມືກັນແກ້ໄຂຢ່າງເລັ່ງດ່ວນ.

ເວົ້າໂດຍລວມ, ໃນທົ່ວໂລກ ແລະ ເວົ້າສະເພາະ ໃນປະເທດອາຊຽນ ແມ່ນມີຈຸດປະສົງຢາກລົບລ້າງພະຍາດວໍ້ ໃນປີ 2030 ແລະ ເພື່ອໃຫ້ໄປຕາມຈຸດປະສົງ ແລະ ທິດຊີ້ນຳຂອງລັດຖະບານ ຕ້ອງການລົບລ້າງພະຍາດດັ່ງກ່າວ ແມ່ນຂໍຄວາມຮ່ວມມືຈາກສື່ມວນຊົນ ສຸມໃສ່ໂຄສະນາຜົນຮ້າຍ ແລະ ການຕ້ານພະຍາດວໍ້ ພ້ອມທັງ ກະຕຸກຊຸກຍູ້ໃຫ້ພໍ່ແມ່ ປະຊາຊົນບັນດາເຜົ່າໃນຂອບເຂດທົ່ວປະເທດ ເອົາໃຈໃສ່ຕໍ່ສັດລ້ຽງຂອງຕົນ ໂດຍການນຳສັດລ້ຽງມາຊັກວັກຊິນກັນພະຍາດວໍ້ເປັນປະຈຳ.

Medialaos MMD