ລັດຖະມົນຕີຕ່າງປະເທດຍີ່ປຸ່ນ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ໃນລະຫວ່າງວັນທີ 22-24 ສິງຫາ 2020. ເພື່ອເປັນການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ແລະ ການເປັນຄູ່ຮ່ວມຍຸດທະສາດ ລະຫວ່າງສອງປະເທດ ໂດຍບັນລຸການລົງນາມເອກະສານແລກປ່ຽນ ໂຄງການປັບປຸງວິທະຍາໄລສ້າງຄູ ໃຫ້ແກ່ ສປປ ລາວ ມູນຄ່າ 18 ລ້ານໂດລາ ແລະ ໂຄງການຊ່ວຍເຫຼືອລົດເມ, ອາໄຫຼ່ ແລະ ອຸປະກອນສຳລັບສ້ອມແປງລົດເມ ມູນຄ່າ 4,6 ລ້າໂດລາ.

ໃນ​​ວັນ​ທີ 23 ສິງຫາ 2020, ທີ່ ກະຊວງ​ການ​ຕ່າງປະ​ເທດ, ​ໄດ້​ມີ​ການ​ພົບ​ປະ​ 2 ຝ່າຍລະຫວ່າງ ລາວ – ຢີ່ປຸ່ນ, ເຊິ່ງຝ່າຍລາວນຳໂດຍ ທ່ານ ສະ​ເຫຼີມ​ໄຊ ກົມມະ​ສິດ, ລັດຖະມົນຕີ​ກະຊວງການ​ຕ່າງປະ​ເທດ ​ແຫ່ງສປປ ລາວ ພ້ອມດ້ວຍຄະນະ ແລະ ຝ່າຍຍີ່ປຸ່ນນຳໂດຍ ທ່ານ ໂມເຕງິ ໂທຊິມິດຊຶ, ລັດຖະມົນຕີຕ່າງປະ​ເທດຍີ່ປຸ່ນ ພ້ອມດ້ວຍຄະນະ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງ ທ່ານລັດຖະມົນຕີຕ່າງປະເທດຍີ່ປຸ່ນ ພ້ອມດ້ວຍຄະນະໃນຄັ້ງນີ້, ເຊິ່ງເປັນ​ນິ​ມິດ​ໝາຍ​ທີ່​ສຳ​ຄັນໃນ​ການ​ສືບ​ຕໍ່ເພີ່ມ​ທະ​ວີຮັດແໜ້ນ​ສາຍພົວ​ພັນມິດ​ຕະ​ພາບແລະການຮ່ວມມືລະຫວ່າງສປປລາວແລະຍີ່ປຸ່ນ, ໂດຍສະເພາະແມ່ນ ການຢ້ຽມຢາມໃນຄັ້ງນີ້ໄດ້ເປັນການປະກອບສ່ວນອັນສໍາຄັນໃນການສະເຫຼີມສະຫຼອງວັນສ້າງຕັ້ງສາຍພົວພັນການທູດຄົບຮອບ 65 ປີ(05 ມິຖຸນາ 1955) ແລະການເປັນຄູ່​ຮ່ວມ​ຍຸດ​ທະ​ສາດລະຫວ່າງສອງ​ປະ​ເທດລາວແລະຍີ່​ປຸ່ນຄົບຮອບ 05 ປີ ໃນປີ 2020 ນີ້.

ພ້ອມນີ້, ທ່ານຍັງໄດ້ສະແດງຄວາມຊົມເຊີຍທ່ານໂມເຕງິໂທຊິມິດຊຶ ທີ່ໄດ້ຮັບການແຕ່ງຕັ້ງເປັນລັດຖະມົນຕີຕ່າງປະເທດຍີ່ປຸ່ນຄົນໃໝ່ໃນເດືອນກັນຍາ 2019 ຜ່ານມາ ແລະ ໄດ້ສະແດງຄວາມເຫັນໃຈໄປຍັງລັດຖະບານ ແລະ ປະຊາຊົນ ຍີ່ປຸ່ນ ໂດຍສະເພາະຄອບຄົວຜູ້ທີ່ໄດ້ຮັບຜົນກະທົບຈາກເຫດການນ້ຳຖ້ວມ ແລະ ດິນເຈື່ອນຢ່າງໜັກໜ່ວງຢູ່ພາກຕາເວັນຕົກສ່ຽງໃຕ້ຂອງປະເທດຍີ່ປຸ່ນໃນຕົ້ນເດືອນກໍລະກົດຜ່ານມາ.

ໃນການພົບປະຄັ້ງນີ້, ສອງ​ຝ່າຍ​ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຂອງສອງປະເທດລາວ-ຍີ່ປຸ່ນ ໃນຖານະເປັນຄູ່ຮ່ວມຍຸດທະສາດທີ່ນັບມື້ນັບຂະຫຍາຍຕົວເຂົ້າສູ່ລວງກວ້າງ, ລວງເລິກ ແລະເປັນຮູບປະທຳຢ່າງຕໍ່ເນື່ອງ. ສອງຝ່າຍໄດ້ສະແດງຄວາມຍິນດີທີ່ສອງປະເທດ ໄດ້ມີການຮ່ວມມືເພື່ອພັດທະນາ ສປປ ລາວແບບຍືນຍົງຮ່ວມກັນ, ເຊິ່ງໄດ້ຮັບການຈັດຕັ້ງປະຕິບັດນັບແຕ່ປີ 2016 ເປັນຕົ້ນມາ, ແຜນ​ການ​ຮ່ວມມືດັ່ງ​ກ່າວ ​ໄດ້ປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ 5 ປີຄັ້ງທີ 8 ຂອງສ​ປ​ປລາວແລະໄດ້ນໍາເອົາໝາກ​ຜົນທີ່​ເປັນຮູບ​ປະ​ທຳ​ມາ​ສູ່ປະ​ຊາ​ຊົນ​ລາວ​ຢ່າງ​ແທ້​ຈິງ.ພ້ອມດຽວກັນນີ້, ສອງຝ່າຍຍັງໄດ້ປຶກສາຫາລື ກ່ຽວກັບ ການປັບປຸງແຜນປະຕິບັດງານການເປັນຄູ່ຮ່ວມຍຸດທະສາດລະຫວ່າງສປປລາວແລະຍີ່ປຸ່ນໃຫ້ແທດເໝາະກັບສະພາບຕົວຈິງ ແນໃສ່ຊຸກຍູ້ສົ່ງເສີມ ແລະ ຮັດແໜ້ນການພົວພັນຮ່ວມມືໃຫ້ໃກ້ຊິດ ແລະ ຂະຫຍາຍຕົວຍິ່ງໆຂຶ້ນ.

ນອກຈາກນັ້ນ, ສອງຝ່າຍໄດ້ປຶກສາຫາລື ກ່ຽວກັບ ຄວາມອາດສາມາດ ແລະ ເງື່ອນໄຂໃນການຈັດຕັ້ງປະຕິບັດມາດຕະການຜ່ອນຜັນສຳລັບພົນລະເມືອງຂອງສອງປະເທດຜູ້ທີ່ໄດ້ຮັບອະນຸຍາດມາຢູ່ໄລຍະຍາວທີ່ມີທີ່ຕັ້ງພູມລຳເນົາແລ້ວ(ResidenceTrack) ແລະ ສໍາລັບພາກທຸລະກິດ(Business Track), ເຊິ່ງຈະໄດ້ສືບຕໍ່ເຮັດວຽກຮ່ວມກັນ ເພື່ອໃຫ້ມີການຈັດຕັ້ງປະຕິບັດຊ່ອງທາງດັ່ງກ່າວໃນອະນາຄົດ, ພ້ອມນີ້, ຝ່າຍລາວ ຍັງໄດ້ເຊີນຊວນ ແລະ ຊຸກຍູ້ຝ່າຍຍີ່ປຸ່ນຂົນຂວາຍນັກລົງທຶນຍີ່ປຸ່ນ ໃຫ້ມາລົງທຶນຢູ່ ສປປ ລາວ ນັບມື້ນັບເພີ່ມຂຶ້ນ;ສອງຝ່າຍຍັງໄດ້ປຶກສາຫາລື ກ່ຽວກັບ ການຮ່ວມມືດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ, ການພັດທະນາລະບົບພື້ນຖານໂຄງລ່າງ (ສຶກສາຄວາມເປັນໄປໄດ້ໃນການອອກແບບກໍ່ສ້າງເສັ້ນທາງດ່ວນ ວຽງຈັນ-ຮ່າໂນ້ຍ) ແລະ ອື່ນໆ. ພ້ອມດຽວກັນນັ້ນ, ສອງຝ່າຍຍັງໄດ້ແລກປ່ຽນຄໍາຄິດຄໍາເຫັນຕໍ່ສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.

ໃນໂອກາດດັ່ງກ່າວນີ້, ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະຂອບໃຈຢ່າງເລິກເຊິ່ງ ຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນແລະ ຊ່ວຍເຫຼືອ ສປປ ລາວ ຕະຫຼອດມາໂດຍສະເພາະການຊ່ວຍເຫຼືອທາງການເພື່ອການພັດທະນາ (ODA) ຕໍ່ ສປປ ລາວ,ການ​ສົ່ງ​ອາ​ສາ​ສະ​ໝັກແລະຊ່ຽວ​ຊານຂອງຍີ່​ປຸ່ນມາ​ຊ່ວຍ​ເຫຼືອສ​ປ​ປລາວໃນທຸກໆ​ປີ ລວມທັງການໃຫ້ການຊ່ວຍເຫຼືອລັດຖະບານລາວໃນການປ້ອງກັນ ແລະ ຄວບຄຸມພະຍາດ ໂຄວິດ-19.

ໃນຂະນະດຽວກັນ, ທ່ານ ໂມເຕງິ ໂທຊິມິດຊຶ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະຕີລາຄາສູງຕໍ່ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນທັງໃນຂອບການຮ່ວມມືສອງ​ຝ່າຍ ແລະ ຫລາຍ​ຝ່າຍ; ພ້ອມ​ທັງ​ສະ​ແດງ​ຄວາມຍິນດີສືບຕໍ່ໃຫ້ການຮ່ວມມືກັບຝ່າຍລາວເພື່ອເສີມຂະຫຍາຍສາຍພົວພັນມິດຕະພາບແລະ ການຮ່ວມມືອັນດີງາມທີ່ມີມາແຕ່ດົນນານ ແລະ ການເປັນຄູ່ຮ່ວມຍຸດທະສາດລະຫວ່າງ ສປປ ລາວ ແລະ ຍີ່ປຸ່ນ ໃຫ້ນັບມື້ນັບກ້າວເຂົ້າສູ່ລວງເລິກ.

ພາຍຫຼັງກອງປະຊຸມພົບປະສອງຝ່າຍ ໄດ້ມີພິທີລົງນາມເອກະສານແລກປ່ຽນ 02 ໂຄງການ ຄື: 1) ໂຄງການປັບປຸງວິທະຍາໄລສ້າງຄູ ໃຫ້ແກ່ ສປປ ລາວ ມູນຄ່າ 1.922 ລ້ານເຢັນ ຫຼື ປະມານ 18 ລ້ານໂດລາສະຫະລັດ; 2)ໂຄງການຊ່ວຍເຫຼືອລົດເມ, ອາໄຫລ່ ແລະ ອຸປະກອນສຳລັບສ້ອມແປງລົດເມ ມູນຄ່າ 500 ລ້ານເຢັນ ຫຼື ປະມານ 4,6 ລ້ານໂດລາສະຫະລັດ. ນອກຈາກນັ້ນ, ກໍ່ໄດ້ມີພິທີມອບ-ຮັບ ອຸປະກອນການແພດຈຳນວນໜຶ່ງ ຂອງໂຄງການຊ່ວຍເຫຼືອອຸປະກອນການແພດໃຫ້ແກ່ ສປປ ລາວ ເພື່ອຕ້ານການແຜ່ລະບາດຂອງພະຍາດ ໂຄວິດ-19 ມູນຄ່າ 1,5 ຕື້ເຢັນ (13,7 ລ້ານໂດລາສະຫະລັດ).

ໃນໂອກາດຢ້ຽມຢາມ ສປປ ລາວ ໃນຄັ້ງນີ້, ທ່ານລັດຖະມົນຕີຕ່າງປະເທດ ໂມເຕງິ ໂທຊິມິດຊຶ ພ້ອມດ້ວຍຄະນະກໍ່ໄດ້ເຂົ້າຢ້ຽມຂໍ່ານັບ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ທີ່ ສຳນັກງານນາຍົກລັດຖະມົນຕີ.

Medialaos MMD (ແຫຼ່ງຂໍ້ມູນຈາກ: ກົມການຂ່າວ, ກະຊວງການຕ່າງປະເທດ)