ທ່ານ ພັນ​ຄຳ ວິພາ​ວັນ ກຳມະການ​ກົມ​ການເມືອງ​ສູນ​ກາງ​ພັກ ຜູ້​ປະຈຳການ​ຄະນະ​ເລຂາທິການ​ສູນ​ກາງ​ພັກ ຮອງ​ປະທານປະ​ເທດ​ແຫ່ງ ສປປ ລາວ ພ້ອມ​ດ້ວຍ​ຄະນະ ໄດ້​ສືບຕໍ່​ລົງ​ເຄື່ອນ​ໄຫວ​​ຢ້ຽມ​ຢາມ ແລະ ເຮັດ​ວຽກ ພົບ​ປະ​ໂອ້​ລົມ​ຕໍ່ຄະນະ​ປະຈຳ​ພັກ​ແຂວງ, ຫົວ​ໜ້າ​ພະ​ແນ​ກ​ການ, ກົມ​ກອງ, ອົງການ ແລະ ເຈົ້າເມືອງ 10 ເມືອງ ຢູ່​ພາຍ​ໃນ​ແຂວງ​ຫົວພັນ​ວັນ​ທີ 25 ສິງຫານີ້.

ທ່ານ ວັນ​ໄຊ ແພງ​ຊຸມ​ມາ, ກຳມະການ​ສູນ​ກາງ​ພັກ, ເລຂາ​ພັກ​ແຂວງ ເຈົ້າແຂວງໆ ຫົວພັນ ໄດ້​ລາຍ​ງານ​ສະພາບ​ການ​ລວມ​ໂດຍ​ຫຍໍ້​ການ​ປະຕິບັດ​ໜ້າທີ່​ວຽກ​ງານ​ພາຍ​ໃນ​ແຂວງ​ໃນ​ໄລຍະ​ຜ່ານ​ມາ, ແຂວງ​ຫົວພັນ​ກໍ​ເປັນ​ແຂວງ​ໜຶ່ງ​ທີ່​ໄດ້​ຮັບ​ຜົນ​ກະທົບ​ຈາກ​ການ​ແຜ່​ລະບາດ​ຂອງ​ພະຍາດ ໂຄ​ວິດ -19  ແລະ ອັນ​ທີ່​ຮ້າຍ​ແຮງ​ທີ່​ສຸດ​ແມ່ນ​ການ​ແຜ່​ລະບາດ​ຂອງ​ໂຕ​ຕັກ​ກະ ແຕນທີ່​ທຳລາຍ​ຜົນລະປູກ​ຂອງ​ປະ​ຊາ​ຊົົນ ອັນ​ເຮັດ​ໃຫ້​ເກີດ​ຄວາມເສຍ​ຫາຍຕໍ່​ຜົນລະປູກ​ ຂອງ​ປະຊາຊົນ​ຢ່າງ​ຫຼວງຫຼາຍ

ແລະ ການ​ຂະຫຍາຍຕົວ​ຂອງ​ເສດຖະກິດ​ຂອງ​ແຂວງ​ກໍ​ພົບ​ຄວາມ​ຫຍຸ້ງຍາກ ແລະ ບໍ່​ສາມາດ​ບັນລຸ​ຕາມ ແຜນການ​ທີ່​ວາງ​ໄວ້. ເຖິງ​ຢ່າງໃດ​ກໍ່​ຕາມ​ຄະ​ນະ​ນໍາ​ຂອງ​ແຂວງ​ກໍ​ໄດ້​ເອົາໃຈໃສ່​ໃນ​ການ​ນໍາ​ພາ ແລະ ຊຸກຍູ້​ການ​ຜະລິດ​ຂອງ​ປະຊາຊົນ​ໃຫ້​ກຸ້ມ​ພາຍ​ໃນ​ແຂວງ, ສ້າງ​ເງື່ອນໄຂ​ໃຫ້​ບັນດາ​ທຸລະ​ກິດ​ສາມາດ​ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ​ເພິ່ງ​ຕົນ​ເອງ​ໄດ້ ເພື່ອ​ຮັກສາ​ຈັງຫວະ​ການ​ເຕີບ​ໂຕ​ທາງ​ດ້ານ​ເສດຖະກິດ​ບໍ່​ໃຫ້​ຫຼຸດ​ໂຕນ​ກັນ​ຫຼາຍ,ກໍ່ສ້າງ​ພື້ນຖານ​ໂຄງ​ລ່າງ​ທີ່​ມີ​ຄວາມ ຈໍາ​ເປັນ,  ຫັນ​ພະນັກງານ​ລົງ​ກໍ່ສ້າງ​ຮາກ​ຖານ​ຢູ່​ຊົນນະບົດ, ຢູ່​ເຂດ​ຈຸດ​ສຸມ ແລະ  ຫັນ​ວຽກ​ງານ ປ້ອງ​ກັນ ຊາດ​-​ປ້ອງ​ກັນ​ຄວາມ​ສະຫງົບ ເປັນ​ຂອງ​ທົ່ວ​ປວງ​ຊົນ​ຮອບດ້ານ ເຮັດ​ໃຫ້​ແຂວງ​ມີ​ສະຖຽນ​ລະ​ພາບ ທາງ​ດ້ານ​ການເມືອງ ຮັກສາ​ໄດ້​ຄວາມ​ສະຫງົບ​ໂດຍ​ພື້ນ​ຖານ.

ເນື່ອງ​ໃນ​ໂອກາດ​ພົບ​ປະ​ໂອ້​ລົມ ສະຫາຍ ຮອງ​ປະທານ​ປະເທດ ໄດ້​ເນັ້ນ​ໜັກ​ໃຫ້​ຄະນະ​ພັກ, ອົງການ​ປົກຄອງ ແຂວງ​ສຸມ​ໃສ່​ການ​ກະກຽມ​ດຳເນີນ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ອົງຄະ​ນະ​ພັກ ແຂວງ ໃຫ້​ມີ​ຄວາມ​ພ້ອມ​ຮອບດ້ານ ແລະ ທັນ​ຕາມ​ເວລາ​ທີ່​ໄດ້​ກຳນົດ​ໄວ້. ພ້ອມ​ນີ້ ສະຫາຍ​ໄດ້​ຊີ້​ນຳ​ໃຫ້​ແຕ່​ລະ​ອະນຸ​ກຳມະການ ເປັນຕົ້ນ ອະນຸ​ກຳມະການ​ເນື້ອ​ໃນ, ອະນຸ​ກຳມະການ​ບຸກ​ຄະລາ​ກອນ ແລະ ອະນຸ​ກຳມະການ​ຂະບວນ​ການ ຈົ່ງ​ຮີບ​ຮ້ອນ​ກວດກາ​ຄືນ​ບັນດາ​ໜ້າ​ວຽກ​ຂອງ​ຕົນ ທີ່​ໄດ້​ຈັດ​ຕັ້ງ​ປະຕິບັດ​ໄປ​ແລ້ວ​ນັ້ນ ວ່າ​ອັນ​ໃດ​ທີ່​ຍັງ​ເປັນ​ຂໍ້ຄົງຄ້າງ, ອັນ​ໃດ​ທີ່​ຍັງ​ບໍ່​ທັນ​ບັນລຸ ຕາມ​ຄາດໝາຍ ແລະ ອັນ​ໃດ​ທີ່​ຍັງ​ບໍ່​ທັນ​ສົມບູນ​ຄົບ​ຖ້ວນ ແລ້ວ​ພ້ອມ​ກັນ​ສືບຕໍ່​ປັບປຸງ​ໜ້າ​ວຽກ​ຂອງ​ຕົນ ໃຫ້​ລະອຽດ​ຈະແຈ້ງ, ຮັດກຸມ ແລະ ສອດຄ່ອງ​ກັບ​ສະພາບ​ຄວາມ​ເປັນ​ຈິງ​ທຸກ​ດ້ານ ເພື່ອ​ຮັບປະກັນ​ໃຫ້​ແກ່​ການ​ກະກຽມ​ດຳເນີນ​ກອງ​ປະຊຸມ​ໃຫຍ່ ຂອງ​ອົງຄະ​ນະ​ພັກ ແຂວງ ໄດ້​ລຸ​ລ່ວງ ແລະ ມີ​ຄວາມ​ພ້ອມ 100% ຂະນະ​ດຽວ​ກັນ ສະຫາຍ​ໄດ້​ເນັ້ນ​ໜັກ​ໃຫ້​ຄະນະ​ພັກ, ອົງການ​ປົກຄອງ​ທຸກ​ຂັ້ນ ຈົ່ງ​ສືບຕໍ່​ປັບປຸງ​ແບບແຜນ​ວິທີ​ນຳພາ ແລະ ແບບແຜນ​ວິທີ​ເຮັດ​ວຽກ ໃຫ້​ເຂົ້າ​ສູ່​ລະບຽບ​ຫຼັກການ ຢ່າງ​ລະອຽດ​ຈະແຈ້ງ ໂດຍ​ຢຶດ​ໝັ້ນ​ຕາມ​ຫຼັກການ​ຂອງ​ພັກ ຢ່າງ​ເຂັ້ມ​ງວດ, ໃນ​ນັ້ນ ການ​ຄຸ້ມ​ຄອງ​ລັດ​-​ຄຸ້ມ​ຄອງ​ເສດ​ຖະ​ກິດ​-​ສັງຄົມ ໃຫ້​ກ້າວ​ເຂົ້າ​ສູ່​ການ​ຄຸ້ມ​ຄອງ ດ້ວຍ​ລະບຽບ​ກົດໝາຍ ຢ່າງ​ເຄັ່ງ​ຄັດ ໂດຍ​ສອດ​ຫ້ອຍ​ກັບ​ການ​ໂຄສະນາ​ເຜີຍແຜ່​ແນວທາງ​ນະໂຍບາຍ​ຂອງ​ພັກ, ແຜນ​ພັດທະນາ​ເສດ​ຖະ​ກິດ​-​ສັງຄົມ ຂອງ​ລັດ ໃຫ້​ພະນັກງານ​ສະມາຊິກ​ພັກ ແລະ ປະຊາຊົນ​ບັນດາເຜົ່າ ໄດ້​ກຳ​ແໜ້ນ​ເຊື່ອມ​ຊຶມ ແລະ ເຂົ້າໃຈ​ຢ່າງ​ເລິກເຊິ່ງ ໄປ​ຄຽງ​ຄູ່​ກັບ​ການ​ເຕົ້າໂຮມ​ຄວາມ​ສາມັກຄີ​ພາຍ​ໃນ​ພັກ, ຄວາມ​ສາມັກຄີ​ບັນດາເຜົ່າ ແລະ ທຸກ​ຊັ້ນ​ຄົນ​ໃນ​ສັງຄົມ ໃຫ້​ເປັນ​ປຶກ​ແຜ່ນ, ພ້ອມ​ກັນ​ຕີ​ຖອຍ​ປະກົດ​ການ​ແນວ​ຄິດ​ຄັບແຄບ, ແນວ​ຄິດ​ທ້ອງຖິ່ນ ແລະ ແນວ​ຄິດ​ກຸ່ມ​ກ້ອນ ບໍ່​ໃຫ້​ເກີດ​ຂຶ້ນ​ພາຍ​ໃນ​ພັກ ແລະ ໃນ​ໝູ່​ມະຫາຊົນ ຢ່າງ​ເດັດຂາດ, ຕັ້ງໜ້າ​ປຸກລະດົມ​ຂົນຂວາຍ​ປະຊາຊົນ​ບັນດາເຜົ່າ ໃຫ້​ເປັນ​ເຈົ້າ​ການ​ເຂົ້າ​ຮ່ວມ​ວຽກ​ງານ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ ທົ່ວ​ປວງ​ຊົນ​ຮອບດ້ານ ຢ່າງ​ໜັກ​ແໜ້ນ ໂດຍ​ຕິດ​ພັນ​ກັບ​ການ​ແກ້​ໄຂ​ຊີວິດ​ການ​ເປັນ​ຢູ່ ຂອງ​ປະຊາຊົນ​ບັນດາເຜົ່າ ໃຫ້​ນັບ​ມື້​ໄດ້​ຮັບ​ການ​ປັບປຸງ​ດີ​ຂຶ້ນ​ຢ່າງ​ຕໍ່​ເນື່ອງ ໂດຍ​ຖື​ເອົາ​ການ​ຊຸກຍູ້​ສົ່ງເສີມ​ການ​ຜະລິດ​ເປັນ​ສິນຄ້າ ຂອງ​ເຂົາເຈົ້າ ໃຫ້​ເປັນ​ຂະບວນ​ການ​ກວ້າງຂວາງ ເພື່ອ​ສ້າງ​ລາຍ​ຮັບ​ເຂົ້າ​ຄອບຄົວ ໃຫ້​ມີ​ບາດກ້າວ​ດີ​ຂຶ້ນ, ໝັ້ນຄົງ ແລະ ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ ເທື່ອ​ລະ​ກ້າວ ທັງ​ພ້ອມ​ກັນ​ພັດທະນາ​ເສດຖະກິດ ຂອງ​ແຂວງ​ຫົວພັນ​ໃຫ້​ມີ​ຖ່ວງ​ທ່າ​ເຕີບ​ໃຫຍ່​ຂະຫຍາຍຕົວ ແລະ ກ້າວ​ເຂົ້າ​ສູ່​ຄວາມ​ສີວິໄລ ຂຶ້ນ​ເລື້ອຍໆ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)