ໃນໂອກາດເດີນທາງໄປເຮັດວຽກ ແລະ ຢ້ຽມຢາມແຂວງບໍ່ແກ້ວ ໃນລະຫວ່າງວັນທີ 20-22 ສິງຫາ 2020 ທ່ານ ບຸນທອງ ຈິດມະນີ ກຳມະການກົມການ ເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການ ສໍ້ລາດບັງຫລວງຂັ້ນສູນກາງ ໄດ້ເຄື່ອນໄຫວຢ້ຽມຢາມ ແລະ ໂອ້ລົມພະນັກງານຫລັກແຫ່ງ ຂອງເມືອງຕົ້ນເຜິ້ງ ແຂວງບໍ່ແກ້ວ, ໂດຍມີທ່ານເຈົ້າເມືອງ, ຄະນະປະຈໍາພັກ,  ຄະນະພັກເມືອງ, ພະນັກງານທີ່ກ່ຽວຂ້ອງ ເຂົ້າຮ່ວມຮັບຟັງ.

ໃນໂອກາດນີ້, ທ່ານເຈົ້າເມືອງຕົ້ນເຜິ້ງ ໄດ້ລາຍງານສະພາບ ການພັດທະນາ ເສດຖະກິດສັງຄົມຂອງເມືອງ ໃຫ້ທ່ານຮອງນາຍົກ ພ້ອມຄະນະຊາບ. ເມືອງຕົ້ນເຜິ້ງເປັນເມືອງໜຶ່ງ ທີ່ຂຶ້ນກັບແຂວງບໍ່ແກ້ວ ມີຊາຍແດນຕິດຈອດກັບ 2 ປະເທດ ຄື ໄທ ແລະ ມຽນມາ, ມີພົນລະເມືອງ 32.743 ຄົນ, ຍິງ 16.160 ຄົນ, ມີ 6.004 ຄົວເຮືອນ, ປະກອບ ມີ 38 ບ້ານ, ແບ່ງອອກເປັນ 7 ກຸ່ມບ້ານ ແລະ 4 ບ້ານໃຫຍ່ ມີທັງໝົດ 10 ເຜົ່າ,​ ອາຊີບຕົ້ນຕໍຂອງປະຊາຊົນ ແມ່ນປູກຝັງ-ລ້ຽງສັດ ແລະ ເຮັດການບໍລິການຄ້າຂາຍ.

ໃນໄລຍະຜ່ານມາ ເມືອງໄດ້ສຸມໃສ່ຊຸກຍູ້ ຊາວກະສິກອນ ຜະລິດກະສິກຳການປູກຝັງ, ລ້ຽງສັດ, ຜະລິດເປັນສິນຄ້າຢູ່ບັນດາກຸ່ມບ້ານ, ບ້ານໃຫຍ່ ເພື່ອຮັບປະກັນການ ຕອບສະໜອງສະບຽງອາ ຫານໃຫ້ພາຍໃນ ແລະ ສົ່ງອອກເປັນຕົ້ນ ສຸມໃສ່ຜະລິດເຂົ້ານາປີ ໃນເນື້ອທີ່ 2.448 ຮຕ, ໄຮ່ໝູນວຽນເນື້ອທີ່ 473,4 ຮຕ, ມາຮອດປັດຈຸບັນ, ເນື້ອທີ່ປູກພືດສະບຽງອາຫານມີ 76,67 ຮຕ, ໃນ 1 ເດືອນຜ່ານມາສາມາດ ເກັບກູ້ຜົນຜະລິດໄດ້ 10 ໂຕນ. ອັນພົ້ນເດັ່ນໄດ້ຕັ້ງ ກຸ່ມປູກພືດຜັກບ້ານໃຫຍ່ນ້ຳເກິ່ງໃໝ່ (ຄຸ້ມດອຍແດງ) ຈຳນວນ 01 ກຸ່ມ, ມີ 47 ຄອບຄົວ, ເນື້ອທີ່ 9,4 ເຮັກຕາ ສາມາດເກັບກູ້ຜົນຜະລິດໄດ້ແລ້ວ 3 ໂຕນ. ນອກນັ້ນ, ຍັງມີສວນກ້ວຍຫອມ ເນື້ອທີ່ 792,97 ຮຕ ມີ 20 ບໍລິສັດ, ໝາກພ້າວນໍ້າຫອມ ເນື້ອທີ່ 4,47 ຮຕ, ມີ 1.320 ຕົ້ນ, ຫົວອີບຸກ ເນື້ອທີ່ 30.233 ຮຕ, ມີ 3 ບໍລິສັດ,  ໝາກເດືອຍ ເນື້ອທີ່ 16 ຮຕ, ມີ 4 ບໍລິສັດ, ມັນດ້າງ ເນື້ອທີ່ 46,08 ຮຕ, ມີ 3 ບໍລິສັດ ສາມາດເກັບກູ້ໄດ້ແລ້ວ ຈຳນວນ 40 ໂຕນ, ກາເຟ ເນື້ອທີ່ 8,4 ຮຕ, ສາລີແຂງ ເນື້ອທີ່ 40,26 ຮຕ, ໄມ້ໃຫ້ໝາກ ໃນເນື້ອທີ່ 143,08 ເຮັກຕາ, ຢາງພາລາ 2.839 ຮຕ, ສົ່ງອອກຢາງ ແລ້ວ 70 ໂຕນ, ຟາມງົວ 8 ຟາມ, ມີງົວ 807 ໂຕ, ຟາມແບ້ 1 ຟາມ ມີແບ້ 60 ໂຕ, ໝູ 3 ຄອກ, ມີໝູ 30 ໂຕ ເນື້ອທີ່ 0,96 ຮຕ. ຜ່ານການກວດກາ ແລະ ປະເມີນການພົ້ນທຸກປະຈຳປີ 2020 ມີ 4 ບ້ານເປົ້າໝາຍ 986 ຄອບຄົວ, ສາມາດລຶບລ້າງຄວາມທຸກຍາກໄດ້ 2 ບ້ານ ຄື: ບ້ານຍາງໃຕ້ ແລະ ບ້ານເບີໜຶ່ງ. ໄລຍະຜ່ານມາກໍ່ຄືປັດຈຸບັນ ເມືອງໄດ້ເອົາໃຈໃສ່ ໃນການອະນຸລັກ ແລະ ສົ່ງເສີມວັດທະນະທຳຮີດຄອງປະເພນີອັນດີງາມ ຂອງເຜົ່າຂອງຊາດ ເປັນຕົ້ນເອກະລັກການນຸ່ງຖື, ຂັບລຳ ແລະ ສົ່ງເສີມການທ່ອງທ່ຽວ ອັນພົ້ນເດັ່ນສາມາດເປີດ ແຫລ່ງທ່ອງທ່ຽວ ດ້ານທຳມະຊາດໄດ້ 1 ຈຸດ, ​ພິເສດໃນໄລຍະນີ້ເອົາໃຈໃສ່ ເຜີຍແຜ່ວິທີປ້ອງກັນ ການແຜ່ລະບາດຂອງພະຍາດ ໂຄວິດ-19 ທາງວິທະຍຸ, ໂທລະໂຄ່ງຂອງເມືອງ ແລະ ບ້ານເປັນປົກກະຕິ.

ໂອກາດນີ້, ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ການນໍາ ຂອງເມືອງ ໂດຍທ່ານໄດ້ເນັ້ນໜັກ ໃຫ້ຮີບຮ້ອນເຊື່ອມຊຶມ ແລະ ຜັນຂະຫຍາຍມະຕິ ກອງປະຊຸມໃຫຍ່ຂອງເມືອງ ທີ່ຫາກໍ່ສໍາເລັດໄປແລ້ວນັ້ນ ໂດຍຫັນເປັນອັນລະອຽດ, ຫັນເປັນແຜນງານ, ແຜນວຽກໃຫ້ບັນ ດາຫ້ອງການຂະແໜງການ, ຫັນເອົາວຽກງານປ້ອງກັນ ຊາດ-ປ້ອງກັນຄວາມສະຫງົບ ເປັນຂອງທົ່ວປວງຊົນ,​ ເອົາໃຈໃສ່ເປັນພິເສດ ໃນການເຝົ້າລະວັງ, ປ້ອງກັນ ແລະ ສະກັດກັ້ນພະຍາດ COVID-19 ແລະ ພະຍາດຕາມລະດູການ, ເອົາໃຈໃສ່ໃນການສະກັດ ກັ້ນຢາເສບຕິດ ເນື່ອງຈາກເມືອງຕົ້ນເຜິ້ງ ມີຊາຍແດນຕິດກັບຫລາຍປະເທດ ແລະ ເປັນທາງຜ່ານຂອງຫລາຍກຸ່ມຄົນ, ເອົາໃຈໃສ່ຄົ້ນຄວ້າ ແລະ ໝູນໃຊ້ກໍາລັງແຮງ, ໂອກາດ ແລະ ທ່າແຮງຂອງເມືອງ ທີ່ມີໃນການພັດທະນາເສດຖະກິດ, ຊຸກຍູ້ໃຫ້ປະຊາຊົນມີສ່ວນຮ່ວມ, ໃຫ້ປະຊາຊົນເປັນເຈົ້າ ໃນການຄຸ້ມຄອງ ແລະ ນໍາໃຊ້ທ່າແຮງ ໃນການຜະລິດຕ່າງໆ, ຊຸກຍູ້ການຜະລິດເປັນສິນຄ້າ ຂອງປະຊາຊົນ ໂດຍການແບ່ງສັນປັນສ່ວນວ່າ ອັນໃດຄວນໃຫ້ປະຊາຊົນເປັນຜູ້ເຮັດ, ອັນໃດຄວນເຮັດຮ່ວມກັນ, ອັນໃດຄວນລົງທຶນຮ່ວມ ກັບຕ່າງປະເທດ ຫລື ໃຫ້ຕ່າງປະເທດມາລົງ ທຶນ, ສູ້ຊົນສ້າງໃຫ້ເມືອງຕົ້ນເຜິ້ງ ກາຍເປັນເມືອງກຸ້ມຕົນເອງໃນອະນາຄົດ.

ສືບຕໍ່ຊຸກຍູ້ ແລະ ແກ້ໄຂຄວາມທຸກຍາກຂອງປະຊາຊົນ ເກັບກໍາສະພາບຄອບຄົວທຸກຍາກ, ບ້ານທຸກຍາກ ແລະ ສົ່ງເສີມໃຫ້ເຂົາ ເຈົ້າມີລາຍຮັບເພີ່ມຂຶ້ນ ກ້າວໄປສູ່ຄອບຄົວພົ້ນທຸກ. ພິເສດໃນໄລຍະກຽມເປີດສົກຮຽນໃໝ່ນີ້ ໃຫ້ຕິດພັນກັບການປ້ອງກັນພະຍາດ COVID-19 ໃນໂຮງຮຽນ. ພ້ອມນີ້, ຄວນມີແຜນພັດທະນາ, ຝຶກອົບຮົມສີມືແຮງງານ ວ່າຈະຝຶກແຮງງານປະເພດໃດ, ຝຶກມາໃຫ້ເຂົາເຈົ້າເຮັດຫຍັງ, ໂດຍສະເພາະແຮງງານ ທີ່ກັບຈາກຕ່າງປະເທດ ຕ້ອງມີການຝຶກອົບຮົມ ໃຫ້ເຂົາເຈົ້າ ແລະ ຈັດສັນອາຊີບໃຫ້ເຂົາເຈົ້າ ຕາມຄວາມສາມາດ ແລະ ຄວາມຖະໜັດ. ສໍາລັບວຽກງານປັບປຸງພາຍ ໃຫ້ໃຫ້ເອົາໃຈໃສ່ວຽກງານ ກໍ່ສ້າງພັກ-ພະນັກງານ, ພ້ອມທັງຊ່ວຍຊຸກຍູ້ ແນວລາວສ້າງຊາດ,​ ອົງການຈັດຕັ້ງມະຫານຊົນ ໃຫ້ໄດ້ເຄື່ອນໄຫວປະ ຕິບັດໜ້າທີ່ຕາມພາລະບົດບາດ ຂອງຕົນເອງ, ສືບຕໍ່ປັບປຸງແບບແຜນ ວິທີເຮັດວຽກຂອງຄະນະພັກ, ຄະ ນະປະຈໍາ ໂດຍຖອດຖອນບົດຮຽນ ການນໍາພາໃນໄລະຍະຜ່ານມາ, ເພີ່ມທະວີຄວາມສາມັກຄີ ເປັນເອກະພາບພາຍໃນ ອົງຄະນະພັກ ໂດຍເອົາຄະນະປະຈໍາພັກ ເປັນຫົວຈັກຫ໌ັກແຫລ່ງ ໃນການເຕົ້າໂຮມຄວາມສາມັກຄີ ທົ່ວອົງຄະນະພັກ ແລະ ທົ່ງປວງຊົນພາຍໃນເມືອງ ໃຫ້ເປັນປຶກແຜ່ນ ແລ້ວພ້ອມກັນພັດທະນາ ເມືອງກ້າວໜ້າຕໍ່ໄປ.

ຈາກນັ້ນ, ທ່ານຮອງນາຍົກລັດຖະມົນຕີ ໄດ້ເດີນທາງໄປຢ້ຽມຢາມ ເຂດເສດຖະກິດພິເສດສາມ ຫລ່ຽມຄໍາ ຟັງການລາຍງານສະພາບ ການພັດທະນາ ເສດຖະກິດພິເສດ ສາມຫລ່ຽມຄໍາ ທີ່ຕັ້ງຢູ່ເມືອງຕົ້ນເຜີ້ງແຂວງບໍ່ແກ້ວ, ຢ້ຽມຊົມການກໍ່ສ້າງ ແລະ ພັດທະນາທ່າເຮືອຂົນສົ່ງສິນຄ້າ, ທ່າເຮືອຂົນສົ່ງໂດຍ ສານ ແລະ ທ່ຽວຊົມການພັດທະນາ ແຫລ່ງທ່ອງທ່ຽວ ດອນຊາວຕື່ມອີກ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)