ບັນດາໂຮງຮຽນ, ສະຖາບັນການສຶກສາ ທັງພາກລັດ ແລະ ເອກະຊົນ ໃນຂອບເຂດທົ່ວປະເທດ ແມ່ນຈະເລີ່ມໄຂສົກຮຽນໃໝ່ (2020-2021) ໃນວັນທີ 1 ກັນຍາ ທີ່ຈະມາເຖິງນີ້ ແລະ ພ້ອມກັນສືບຕໍ່ປະຕິບັດ ມາດຕະການປ້ອງກັນ ຄວບຄຸມ ແລະ ແກ້ໄຂການລະບາດ ຂອງເຊື້ອພະຍາດອັກເສບປອດ ທີ່ເກີດຈາກເຊື້ອຈຸລະໂຣກ ສາຍພັນໃໝ່ (ໂຄວິດ-19) ຂອງຄະນະສະເພາະກິດ ແຫ່ງຊາດຢ່າງເຂັ້ມງວດ, ຮຽກຮ້ອງໃຫ້ສະຖານ ການສຶກສາທຸກແຫ່ງ ຈົ່ງທົບທວນມາດຕະການ, ການກຽມຄວາມພ້ອມຂອງບຸກຄະລາກອນ, ຈັດການສຸຂະສຶກສາ ໃຫ້ຄວາມຮູ້ແກ່ ຜູ້ບໍລິຫານ-ຄູອາຈານ ແລະ ນັກຮຽນ-ນັກສຶກສາ ເປັນຕົ້ນ ການປະຕິບັດມາດຕະການ ຮັກສາໄລຍະຫ່າງ, ໃສ່ຜ້າອັດປາກ-ອັດດັງ, ສົ່ງເສີມການລ້າງມື ໃສ່ສະບູເປັນປົກກະຕິ ໃຫ້ກາຍເປັນວັດທະນາທຳ, ຫລີກລ່ຽງການຈັດ ກິດຈະກຳທີ່ມີຈຳນວນຜູ້ເຂົ້າຮ່ວມຫລາຍ ແລະ ຟຸມເຟືອຍ, ຕໍ່ລູກຫລານ, ນັກຮຽນ, ນັກສຶກສາ ຖ້າຫາກມີອາການບໍ່ສະບາຍ ໃຫ້ພັກຜ່ອນຢູ່ເຮືອນ ແລະ ໄປພົບແພດ-ໝໍ, ຖ້າຫາກພົບນັກຮຽນ ທີ່ມີອາການບໍ່ສະບາຍ ແມ່ນໃຫ້ແຍກ ໄວ້ຫ້ອງພະຍາບານກ່ອນ ເພື່ອປະສານຫາຜູ້ປົກຄອງ ຫລື ແພດໝໍທີ່ຢູ່ໃກ້ ແລະ ປະຕິບັດມາດຕະ ການ ອື່ນໆທີ່ກ່ຽວຂ້ອງ.

ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງ ສຶກສາທິການ ແລະ ກິລາ ໄດ້ຖະແຫລງ ຂ່າວຕໍ່ສື່ມວນຊົນ ໃນວັນທີ 26 ສິງຫາ 2020 ທີ່ກະຊວງສຶກສາທິການ ແລະ ກິລາ ວ່າ: ປະຕິທິນການຈັດ ການຮຽນ-ການສອນ ສຳລັບສົກຮຽນ 2020-2021 ແມ່ນຈະໄດ້ດຳເນີນ ໄປເປັນປົກ ກະຕິ ຄ້າຍກັບທຸກປີ ຄືວັນທີ 1 ກັນຍາ 2020 ເປັນມື້ໄຂສົກຮຽນໃໝ່ ໃນຂອບເຂດທົ່ວປະເທດ. ປີນີ້ພວກເຮົາໄດ້ຮັບຜົນກະທົບ ຈາກການລະບາດ ຂອງພະຍາດ ໂຄວິດ-19 ເຮັດໃຫ້ຂະແໜງ ການສຶກສາ ແລະ ກິລາ ກໍຄືກັບຂະແໜງການອື່ນ ແມ່ນໄດ້ຮັບຜົນກະທົບ ໃນຫລາຍດ້ານ ເຊັ່ນ: ການຮຽນບໍ່ປົກກະຕິ, ມີຄວາມຫຍຸ້ງຍາກ ໃນການປະຕິບັດ ມາດຕະການຮັກສາ ໄລຍະຫ່າງ, ຜ້າອັດປາກ-ອັດດັງ ບໍ່ພຽງພໍ, ນັກຮຽນທີ່ສຶກສາ ຢູ່ຕ່າງປະເທດບໍ່ໄດ້ກັບ ໄປສືບຕໍ່ຮຽນ, ທຶນການສຶກສາ ຂອງຫລາຍປະເທດຖືກໂຈະ, ມີຄວາມສ່ຽງສູງ ຂອງນັກສຶກສາຈົບໃໝ່ ທີ່ຈະບໍ່ໄດ້ເຂົ້າສູ່ ພາກແຮງງານ ແລະ ບັນຫາອື່ນໆ.

ເຖິງຢ່າງໃດກໍຕາມ ຄະນະນຳກະຊວງສຶກສາທິການ ແລະ ກິລາ ໄດ້ມີການປຶກສາຫາລືກັບກົມວິຊາການທີ່ກ່ຽວ ຂ້ອງ ແລະ ປະເມີນສະພາບການ ເປັນປົກກະຕິ ເພື່ອສືບຕໍ່ເຮັດໃຫ້ການຈັດການຮຽນ-ການສອນ ສືບຕໍ່ດຳເນີນໄປ ທັງຮັບປະກັນຄຸນ ນະພາບການສຶກສາ ໃນສະພາບແວດລ້ອມໃໝ່.

ທ່ານ ນາງ ແສງເດືອນ ຫລ້າຈັນທະບູນ ແຈ້ງໃຫ້ຮູ້ຕື່ມວ່າ: ສຳລັບຜູ້ບໍລິຫານ ການສຶກສາ ແລະ ຄູ-ອາຈານ ຈະຕ້ອງໄດ້ທົບທວນຄືນ ກ່ຽວກັບຮູບແບບ ການຈັດການຮຽນ-ການສອນ ເຮົາຈະປັບປ່ຽນຫຍັງແດ່ ເພື່ອໃຫ້ກາຍເປັນຄວາມຊິນເຄີຍ ໃນການດຳລົງຊີວິດປະຈຳວັນແບບໃໝ່ (New Normal) ຈະນຳໃຊ້ເຕັກໂນໂລຊີ ເຂົ້າມາຊ່ວຍຄືແນວໃດ, ຈະນຳໃຊ້ຊ່ອງໂທລະພາບສຶກສາ ແລະ ກິລາ ໃຫ້ເກີດປະໂຫຍດສູງສຸດ ແກ່ການພັດທະນາວິຊາຊີບຄູ, ກຸ່ມໂຮງຮຽນ ແລະ ກຸ່ມເປົ້າໝາຍຜູ້ຮຽນ ທີ່ເຂົ້າບໍ່ເຖິງອິນເຕິເນັດແນວໃດ, ພ້ອມດຽວກັນ ກະຊວງສຶກສາທິການ ແລະ ກິລາ ຈະໄດ້ຈັດພິມ ແລະ ແຈກຢາຍປຶ້ມແບບຮຽນໃຫ້ພຽງພໍ ກັບນັກຮຽນທີ່ຢູ່ ເຂດຊົນນະບົດ-ຫ່າງໄກ ຮັບປະກັນວ່ານັກຮຽນ ການສຶກສາກ່ອນໄວຮຽນ, ປະຖົມສຶກສາ ແລະ ມັດທະຍົມສຶກສາຕອນຕົ້ນ ຈະໄດ້ຮັບພຽງພໍ ຖ້າຫາກ ມີເຫດການສຸກເສີນ ທີ່ບໍ່ຄາດຄິດເກີດຂຶ້ນໃນຕໍ່ໜ້າ.

ສ່ວນພໍ່ແມ່ຜູ້ປົກຄອງ ໃນເຂດທີ່ບໍ່ສາມາດເຂົ້າເຖິງ ຜ້າອັດປາກ-ອັດດັງ ຂໍໃຫ້ຊ່ວຍລູກຫລານຂອງທ່ານ ໃນການຫຍິບ ຜ້າອັດປາກ-ອັດດັງ ໂດຍນຳໃຊ້ຜ້າສະອາດ ແລະ ວັດຖຸທີ່ສາມາດຫາ ໄດ້ໃນທ້ອງຖິ່ນ ເພື່ອເປັນການຫລຸດຜ່ອນ ຄ່າໃຊ້ຈ່າຍຂອງຄອບຄົວ. ປັດຈຸບັນເຊິ່ງເປັນລະດູມໍລະສຸມ ມີຝົນຕົກໜັກເກືອບ ທຸກພາກຂອງປະເທດ ການເດີນທາງຂອງລູກຫລານ ແລະ ພໍ່ແມ່ຜູ້ປົກຄອງ ອາດພົບຄວາມບໍ່ສະດວກ ແລະ ມີຄວາມສ່ຽງທີ່ຈະເກີດໄພອັນຕະລາຍ. ດັ່ງນັ້ນ, ຈຶ່ງຮຽກຮ້ອງໃຫ້ຜູ້ ບໍລິຫານການສຶກສາ ແລະ ກິລາ ແຕ່ລະຂັ້ນ ແລະ ພໍ່ແມ່ຜູ້ປົກຄອງ ຈົ່ງຕິດຕາມແຈ້ງການ ພະຍາກອນອາກາດຢ່າງໃກ້ຊິດ ແລະ ໃຫ້ການແຈ້ງເຕືອນສະຖານການສຶກສາ ໃນຂອບເຂດຄວາມ ຮັບຜິດຊອບຂອງ ທ່ານຢ່າງຕັ້ງໜ້າ.

ພ້ອມກັນນີ້, ສຳລັບນັກຮຽນ-ນັກສຶກສາ ແລະ ພໍ່ແມ່ຜູ້ປົກຄອງ ທີ່ມີລູກຫລານ ກຳລັງສຶກສາຢູ່ຕ່າງປະເທດ ຈົ່ງຕິດຕາມແຈ້ງການມາດຕະການ ແລະ ຂ່າວສານຈາກສະ ຖານເອກອັກຄະລັດຖະທູດ ສປປ ລາວ ເປັນປົກກະຕິ ພ້ອມກັນປະຕິບັດລະບຽບ ການຂອງປະເທດເຈົ້າ ພາບ ແລະ ມາດຕະການເຂົ້າ-ອອກ ສປປ ລາວ ດ້ວຍຄວາມຮັບຜິດຊອບສູງ. ທັງນີ້, ເພື່ອເປັນການ ເຊີດຊູຄຸນສົມບັດ, ປະເພນີອັນດີງາມຂອງຄົນລາວ ໃນເວທີພາກພື້ນ ແລະ ສາກົນ ຜ່ານການປະພຶດປະຕິບັດ ຂອງພວກເຮົາ.

ໂອກາດດຽວກັນນີ້, ທ່ານລັດຖະມົນຕີ ກະຊວງສຶກສາຍັງ ໄດ້ຮຽກຮ້ອງມາຍັງຜູ້ບໍລິຫານ, ຄູ-ອາຈານ, ລູກຫລານ-ນັກຮຽນ-ນັກສຶກສາ ຕະຫລອດຮອດ ພໍ່ແມ່ຜູ້ປົກຄອງ ແລະ ທົ່ວສັງຄົມ ຈົ່ງສຸມທຸກສະຕິປັນຍາ ທ່າແຮງຂອງຕົນ ເພື່ອເຂົ້າຮ່ວມ ແລະ ປະກອບສ່ວນຕໍ່ວຽກ ງານການສຶກສາ, ສ້າງສະພາບແວດລ້ອມ ການສຶກສາ ຕາມທິດ ການຮຽນຮູ້ຕະຫລອດຊີວິດ, ມີຄຸນນະພາບ, ມີຄວາມເທົ່າທຽມ ແລະ ປະຊາຊົນບັນດາເຜົ່າ  ບໍ່ວ່າເຂົາເຈົ້າຈະຢູ່ບ່ອນໃດຂອງ ສປປ ລາວ ສາມາດເຂົ້າເຖິງໄດ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)