ນ້ຳ​ຖ້ວມ​ນະຄອນ​ປາກ​ເຊ​ຍັງ​ຫນ້າ​ເປັນ​ຫ່ວງ​ ນ້ຳຂອງ ​ແລະ​ ນ້ຳ​ເຊ​ໂດນ​ຍັງ​ສືບຕໍ່​ໄຫຼ​ເຂົ້າ​ຖ້ວມ,​ ຂະນະ​ທີ່​ການ​ຊ່ວຍເຫຼືອ​ກອບ​ກູ້​ຍົກຍ້າຍ​ປະຊາຊົນ​ເປັນ​ໄປ​ດ້ວຍ​ຄວາມ​ຍາກ​ລໍາບາກ​ເພາະ​ບາງເ​ຂ​ດ​ນ້ຳ​ໄຫຼ​ແຮງ​ຕ້ອງ​ໄດ້​ໃຊ້​ເຮືອຈັກ​ເຂົ້າ​ຊ່ວຍ,​ ສ່ວນ​ສະຖານະ​ການ​ຢູ່​ເມືອງ​ ແລະ ​ແຂວງ​ສາລະ​ວັນ,​ ນ້ຳ​ເລີ່ມ​ບົກ​ແຫ້ງ​ລົງ​ຢ່າງ​ຕໍ່​ເນື່ອງ​ແຕ່​ຕອນ​ຄ່ຳຂອງ ​ວັນ​ທີ​ 4​ ກັນຍາ​ເປັນ​ຕົ້ນມາ​ແຕ່​ກໍ​ຍັງ​ມີ​ຫຼາຍ​ເຂດ​ຍັງ​ມີ​ນ້ຳ​ຖ້ວມ​ຂັງ,​ ໃນ​ຂະນະ​ທີ່​ເມືອງ​ວາປີ ​ແລະ​ ເມືອງ​ຄົງ​ເຊ​ໂດນ​ນ້ຳ​ຍັງ​ຖ້ວມ​ສູງ​ຢູ່. ​ເນື່ອງ​ຈາກ​ຝົນຕົກ​ຫນັກ​ເຮັດ​ໃຫ້​ນ້ຳ​ເຊ​ໂດນ​ຍື່ງ​ຂຶ້ນ​ຖ້ວມ​ບ້ານ​ເຮືອນ​ປະຊາຊົນ​ຊຶ່ງ​ມາ​ຮອດ​ວັນ​ທີ ​4 ​ກັນຍາ​ນ້ຳ​ໄດ້​ຖ້ວມ ​10​ ເມືອງ​ຂອງ​ແຂວງ​ຈໍາປາ​ສັກ,​ ຂະນະ​ທີ່​ນະຄອນ​ປາກ​ເຊ​ນ້ຳຂອງ ​ແລະ ​ນ້ຳ​ເຊ​ໂດນ ​ໄດ້​ໄຫຼ​ເຂົ້າ​ຖ້ວມ​ຕັ້ງແຕ່​ວັນ​ທີ​ 4​ ກັນຍາ,​ ມາ​ຮອດ​ຕອນ​ແລງ​ຂອງ​ວັນ​ທີ​ 5​ ກັນຍາ​ກໍ​ຍັງ​ບໍ່​ມີ​ທ່າ​ທີ​ວ່າ​ຈະ​ບົກ​ແຫ້ງ​ລົງ.

ພາບມູນສູງ ນະຄອນປາກເຊ

ປະຊາຊົນ​ທີ່ຢູ່​ເຂດ​ນ້ຳ​ຖ້ວມ​ສູງ ​ສ່ວນ​ຫຼາຍ​ໄດ້​ພາກັນ​ເຄື່ອນ​ຍ້າຍ​ຂຶ້ນ​ຢູ່​ເທິງ​ຫຼັງຄາ​ເຮືອນ, ​ຫຼາຍ​ຄົນ ​ຫຼາຍ​ຄອບຄົວ​ໄດ້​ອາ​ໄສ​ເກາະ​ຫຼັງຄາ​ຢູ່​ເປັນ​ເວລາ​ຫຼາຍ​ຊົ່ວໂມງ, ​ໃນ​ຂະນະ​ທີ່​ການ​ຊ່ວຍ​ກອບ​ກູ້ ​ແລະ ​ຍົກຍ້າຍ​ປະຊາຊົນ​ເປັນ​ໄປ​ດ້ວຍ​ຄວາມ​ລໍາບາກ​ເນື່ອງ​ຈາກ​ວ່າ​ນ້ຳ​ໄຫຼ​ເຂົ້າ​ຖ້ວມ​ຢ່າງ​ໄວວາ ​ແລະ ຖ້ວມ​ເປັນ​ບໍລິເວນ​ກວ້າງ​(ເກືອບ​ທົ່ວ​ນະຄອນ​ປາກ​ເຊ) ​ຊຶ່ງ​ຕ້ອງ​ໄດ້​ໃຊ້​ເຮືອ ຈັກ​ເຂົ້າ​ຊ່ວຍ(ບາງ​ເຂດ),​ ຫາກ​ໃຊ້​ເຮືອພາຍ​ສ່ຽງ​ຕໍ່​ການ​ຖືກ​ກະແສນ້ຳ​ພັດ​ໄຫຼ​ໄປ​ກັບ​ນ້ຳ,​ ຂະ ນະ​ທີ່ຜູ້​ປະສົບ​ໄພ​ ຕ້ອງການ​ອາຫານ​ ແລະ​ ນ້ຳດື່ມ​ເປັນ​ຈໍານວນ​ຫຼວງຫຼາຍ​ແຕ່​ການ​ຊ່ວຍ ເຫຼືອ​ຍັງ​ມີ​ຫນ້ອຍ​ເນື່ອງ​ຈາກ​ວ່າ​ບັນດາ​ແຂວງ​ໃກ້​ຄຽງ​ກໍ​ຖືກ​ນ້ຳ​ຖ້ວມ​ເຊັ່ນ​ດຽວ​ກັນ.