ກອງ​ປະຊຸມ​ຜູ້​ນໍາ ຂອບ​ການ​ຮ່ວມ​ມື​ແມ່​ນໍ້າ​ຂອງ​ -​ ແມ່​ນໍ້າ​ລ້ານ​ຊ້າງ ຄັ້ງ​ທີ 3 ໄດ້​ຈັດ​ຂຶ້ນ​ໃນຮູບ ​ແບບ​ທາງໄກ ໃນ​ວັນ​ທີ  24 ສິງຫາ 2020 ໄດ້​ຜ່ານ​ “ຖະ​ແຫຼງ​ການ​ຂອງ​ປະ​ທານ​ຮ່ວມກອງ​ປະ​ຊຸມ​ຜູ້​ນຳ​ຂອບ​ການ​ຮ່ວມ​ມື​ແມ່​ນ້ຳ​ຂອງ – ແມ່​ນ້ຳ​ລ້ານ​ຊ້າງ ຄັ້ງ​ທີ  3  ວ່າ​ດ້ວຍ​ການ​ຮ່ວມ​ມື​ໃນ​ການ​ເຊື່ອມ​ສານ ລະ​ຫວ່າງ ຂອບ​ການ​ຮ່ວມ​ມື​ແມ່​ນ້ຳ​ຂອງ – ແມ່​ນ້ຳ​ລ້ານ​ຊ້າງ ແລະ ແລວ​ທາງ​ການ​ຄ້າ​ທາງ​ບົກ ແລະ  ທາງ​ທະ​ເລ ສາ​ກົນ​ໃໝ່ ”  ເພື່ອ​ຮ່ວມ​ກັນ​ສົ່ງເສີມ​ການ​ພັດທະນາ​ຂອບ​ການ​ຮ່ວມ​ມື​ແມ່​ນໍ້າ​ຂອງ​ – ​ແມ່​ນໍ້າ​ລ້ານ​ຊ້າງ ໃນ​ອະ​ນາ​ຄົດ.  ກອງ​ປະຊຸມໄດ້​ດໍາ​ເນີນ​ພາຍ​ໃຕ້​ການ​ເປັນ​ປະທານ​ຮ່ວມ​ຂອງພະນະທ່ານ  ທອງ​ລຸນ ສີ​ສຸ​ລິດ  ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນ​ລາວ ແລະ ພະນະ​ທ່ານ ຫຼີ ເຄີ້​ສຽງ ນາຍົກລັດຖະມົນຕີ ແຫ່ງ ສາທາລະ ນະ​ລັດ ປະຊາຊົນ​ຈີນ ຊຶ່ງມີ​ປະມຸກ​ລັດ, ຫົວໜ້າ​ລັດຖະບານ​ຂອງ​ປະເທດ​ສະມາຊິກ​ແມ່​ນໍ້າ​ຂອງ ​-​  ແມ່​ນໍ້າ​ລ້ານ​ຊ້າງ​ທັງ​ໝົດ ໄດ້​ເຂົ້າ​ຮ່ວມ​ກອງ​ປະຊຸມ​ດັ່ງ​ກ່າວ.

ພວກ​ເຮົາ ຫວນ​ຄືນ​ເຖິງຖະແຫຼງການ​​ສັນ​ຍາຂອງກອງ​ປະຊຸມ​ຜູ້​ນໍາ​ແມ່​ນໍ້າ​ຂອງ​ -​ ແມ່​ນໍ້າ​ລ້ານ​ຊ້າງ ຄັ້ງ​ທໍາ​ອິດ ໃນ​ວັນ​ທີ 23 ມີນາ 2016, ຖະແຫຼງການ​ພະນົມ​ເປັນ ຂອງກອງ​ປະຊຸມ​ຜູ້​ນໍາ​ແມ່​ນໍ້າ​ຂອງ​ – ​ແມ່​ນໍ້າ​ລ້ານ​ຊ້າງ ຄັ້ງ​ທີ 2 ແລະ ແຜນ​ປະຕິບັດ​ງານ 5 ປີ  ວ່າ​ດ້ວຍການ​ຮ່ວມ​ມື​ແມ່​ນໍ້າ​ຂອງ ​-​ ແມ່​ນໍ້າ​ລ້ານ​ຊ້າງ (2018-2020) ທີ່​ຖືກ​ຮັບຮອງ ໃນ​ວັນ​ທີ 10 ມັງກອນ 2018, ທີ່​ໄດ້​ໝາຍ​ໝັ້ນ ຈະເສີມ​ຂະຫຍາຍ ແລະ ຮັດ​ແໜ້ນ​ການ​ຮ່ວມ​ມື​ຕ່າງ​ຝ່າຍ​ຕ່າງ​ມີ​ຜົນ​ປະໂຫຍດ; ສົ່ງເສີມ​ການ​ພັດທະນາ​ເສດຖະກິດ ແລະ ສັງຄົມ​ຂອງ​ບັນດາ​ປະເທດ ຕາມ​ລໍາ​ແມ່​ນໍ້າ​ຂອງ ​-​ ແມ່​ນໍ້າ​ລ້ານ​ຊ້າງ; ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃນ​ທຸກ​ປະເທດ​ສະມາຊິກ; ຮັດ​ແຄບ​ຄວາມ​ແຕກ​ໂຕນ​ດ້ານ​ການ​ພັດທະນາ​ໃນ​ພາກ​ພື້ນ ແລະ ສ້າງ​ປະຊາ​ຄົມ​ທີ່​ມີ​ອະນາຄົດ​ຮ່ວມ​ກັນ ແຫ່ງ​ສັນຕິພາບ ແລະ ຄວາມ​ຈະເລີນ​ຮຸ່ງເຮືອງ ຂອງ​ປະເທດ​ແມ່​ນໍ້າ​ຂອງ​ -​ ແມ່​ນໍ້າ​ລ້ານ​ຊ້າງ.

ພວກ​ເຮົາ ຮັບ​ຮູ້ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ເປັນ​ກົນ​ໄກ​ການ​ຮ່ວມ​ມື​ອະນຸ​ພາກ​ພື້ນ​ໃໝ່ ທີ່​ມີ​ການ​ປຶກສາ​ຫາລື​ຢ່າງ​ກວ້າງ​ຂວາງ, ມີ​ການ​ປະກອບສ່ວນ ແລະ ມີ​ຜົນ​ປະໂຫຍດຮ່ວມ ລະຫວ່າງ 6 ປະເທດ​ສະມາຊິກ​ດ້ວຍ​ກັນ​ ໂດຍ​​ໝາຍໝັ້ນທີ່ຈະ​ເພີ່ມ​ທະວີ​ການ​ຮ່ວມ​ມືທາງ​ດ້ານ​ເສດຖະກິດ​ຂ້າມ​ຊາຍ​ແດນ ແລະ ການ​ພັດທະນາ ລະຫວ່າງ​ບັນດາ​ປະເທດ​ໃນ​ພາກ​ພື້ນ ຜ່ານ​ການ​ສົ່ງເສີມ​ທາງ​ດ້ານ​ການ​ຄ້າ ແລະ ການ​ລົງ​ທຶນ.

ພວກ​ເຮົາ ຮັບ​ຊາບ​ວ່າ ຂໍ້​ລິ​ເລີ່ມ​ແລວ​ທາງ​ການ​ຄ້າ ທາງບົກ ແລະ ທາງ​ທະເລ ສາກົນ​ໃໝ່ ຈະ​ເຮັດ​ໃຫ້ການ​ເຊື່ອມ​ຈອດ​ຫຼາຍ​ຮູບ​ແບບ​ລະຫວ່າງ ອາຊີ​ຕາເວັນ​ອອກ​ສ່ຽງ​ໃຕ້ ແລະ ທະວີບ​ອາ​ຊີ​-​ເອີ​ຣົບ (Eurasia) ປະກົດ​ຜົນ​ເປັນ​ຮູບ​ປະ​ທໍາ​ຕົວ​ຈິງ ໂດຍ​ຜ່ານ​ພາກ​ຕາເວັນຕົກ​ຂອງ​ຈີນ ເພື່ອ​ກາຍເປັນ​ແລວ​ທາງ​ການ​ຄ້າ​ສາກົນ​ຮອບດ້ານ ທີ່​ເຊື່ອມ​ໂຍງ​ລະບົບ​ການ​ຜະລິດ ແລະ ຕ່ອງ​ໂສ້​ການ​ສະໜອງ​ສິນຄ້າ ແລະ ບໍລິການ​ຂອງ​ພາກ​ພື້ນ ຜ່ານ​ການ​ເຊື່ອມ​ຈອດ​ທາງບົກ ແລະ ທາງ​ທະເລ ແລະ ອຳນວຍ​ຂັ້ນ​ຕອນ​ການ​ແຈ້ງ​ພາສີ​ໃຫ້​ສະດວກ​ໄວ​ຂຶ້ນ.

ພວກ​ເຮົາ ຮັບ​ຮູ້​ເຖິງ​ຄວາມ​ສໍາ​ຄັນ​ຂອງ​ການ​ຮ່ວມ​ມື​ກັນ ລະຫວ່າງ ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ແລະ ແລວ​ທາງ​ການ​ຄ້າ​ທາງບົກ ແລະ ທາງ​ທະເລ ສາກົນ​ໃໝ່ ເພື່ອເສີມ​ຂະຫຍາຍການ​ຮ່ວມ​ມື​ທາງ​ດ້ານ​ເສດຖະກິດ, ການ​ຄ້າ ແລະ ການ​ລົງທຶນ ລະຫວ່າງ​ປະເທດ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ, ສົ່ງເສີມ​ການ​ຄ້າ​ທີ່​ໂລ່ງ​ລ່ຽນ ແລະ ການ​ລົງທຶນ​ທີ່​ຍືນ​ຍົງ, ຍົກ​ລະດັບ​ລະບົບ​ຕ່ອງ​ໂສ້​ການ​ສະໜອງ ແລະ ອຸດ​ສາ​ຫະ​ກໍາ​ຂອງ​ພາກ​ພື້ນ ແລະ ສ້າງ​ເສດຖະກິດ​ອະນຸ​ພາກ​ພື້ນ​ໃຫ້​ມີ​ຄວາມ​ເຂັ້ມແຂງ, ມີ​ສ່ວນ​ຮ່ວມ, ຍືນ​ຍົງ ແລະ ສາມາດ​ແຂ່ງຂັນ​ໄດ້.

ພວກ​ເຮົາ ຮັບ​ຮູ້​ເຖິງ​ກາລະ​ໂອກາດ​ໃນ​ການ​ສ້າງ​ກໍາ​ລັງ​ແຮງ​ຮ່ວມ​ກັນ ລະຫວ່າງ​ຍຸດທະສາດ​ການ​ພັດທະນາ​ແຫ່ງ​ຊາດ​ຂອງ​ປະເທດ​ສະມາຊິກ​ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ ໂດຍ​ສະເພາະ ການ​ພັດທະນາ​ພື້ນຖານ​ໂຄງ​ລ່າງ, ການ​ເຊື່ອມ​ຈອດ, ແລວ​ທາງ​ການ​ຄ້າ​ທາງບົກ ແລະ ທາງ​ທະເລ ສາກົນ​ໃໝ່ ເພື່ອ​ສົ່ງເສີມ​ການ​ຮ່ວມ​ມື​ດ້ານ​ເສດຖະກິດ ແລະ ຊຸກຍູ້​ການ​ເຊື່ອມ​ຈອດ ແລະ ການ​ພັດທະນາ ລະຫວ່າງ​ປະເທດ​ສະມາຊິກ, ອະນຸ​ພາກ​ພື້ນ​ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ ແລະ ກັບ​ນອກ​ພາກ​ພື້ນ.

ເພື່ອ​ສະໜັບສະໜູນ​ການ​ເຊື່ອມ​ສານ ລະຫວ່າງ ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ແລະ ແລວ​ທາງ​ການ​ຄ້າ ທາງບົກ ແລະ ທາງ​ທະເລ​ສາກົນ​ໃໝ່, ໄດ້​ໃຫ້​ຄໍາ​ໝາຍ​ໝັ້ນ ຈະ​ຊ່ວຍ​ສະໜັບສະໜູນ​ດ້ານ​ນະໂຍບາຍ ໂດຍ​ຜ່ານ​ການ​ສະໜອງ ປັດ​ໄຈ​ທີ່​ຈໍາ​ເປັນ ດັ່ງນີ້:
ພວກ​ເຮົາ ຢືນຢັນ​ຄືນຄວາມ​ໝາຍ​ໝັ້ນທີ່​ຈະ​ສົ່ງເສີມ​ການ​ຮ່ວມ​ມື​ດ້ານ​ການ​ເຊື່ອມ​ຈອດ, ການ​ຄ້າ, ການ​ລົງທຶນ ແລະ ຄວາມ​ອາດ​ສາມາດ​ດ້ານ​ການ​ຜະລິດ ໂດຍ​ເພີ່ມ​ທະວີ​ການ​ອໍາ​ນວຍ​ຄວາມ​ສະດວກ​ທາງ​ດ້ານ​ການ​ຄ້າ, ສືບຕໍ່​ຊອກ​ຫາ​ສິ່ງ​ອໍາ​ນວຍ​ຄວາມ​ສະດວກ​ຕ່າງໆ ເພື່ອ​ການ​ເຊື່ອມ​ຈອດ​ທາງບົກ ແລະ ທາງ​ທະເລ, ດໍາ​ເນີນ​ກິດ​ຈະ​ກໍາ​ສົ່ງເສີມ​ການ​ຄ້າ ແລະ ການ​ລົງທຶນ ຫຼາຍ​ຮູບ​ແບບ, ສ້າງ​ຄວາມ​ເຂັ້ມແຂງ ແລະ ຍືນ​ຍົງ​ກວ່າ​ເກົ່າ ໃຫ້​ແກ່​ອຸດ​ສາ​ຫະ​ກໍາ ແລະ ຕ່ອງ​ໂສ້​ການ​ສະໜອງ​ສິນຄ້າ ແລະ ບໍລິການ​ຂອງ​ພາກ​ພື້ນ ເພື່ອ​ຍົກ​ລະດັບ​ການ​ດຳລົງ​ຊີວິດ​ແບບ​ມີ​ຄຸນ​ນະ​ພາບ​ສູງ ແລະ ການ​ພັດທະນາ​ແບບ​ຍືນ​ຍົງ ຂອງພາກ​ພື້ນ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ.

ພວກ​ເຮົາ ຈະ​ເສີມ​ຂະຫຍາຍການ​ຮ່ວມ​ມື​ທາງ​ດ້ານ​ເສດຖະກິດ​ດີ​ຈີ​ຕອນ, ການ​ພັດທະນາ​ຊັບພະຍາກອນ​ມະນຸດ ລວມ​ທັງ ຈຸນ​ລະວິ​ສາ​ຫະ​ກິດ, ວິ​ສາ​ຫະ​ກິດ​ຂະໜາດ​ນ້ອຍ ແລະ ຂະໜາດ​ກາງ ເພື່ອ​ມີ​ແນວທາງ​ແກ້​ໄຂ​ຜົນ​ກະທົບ​ທາງ​ລົບ​ຈາກ​ການ​ລະບາດ​ຂອງ​ພະຍາດ​ໂຄ​ວິດ-19 ຢ່າງ​ມີ​ປະສິດທິພາບ, ຊຸກຍູ້​ການ​ສ້າງ​ວຽກ​ເຮັດ​ງານ​ທໍາ ແລະ ສືບຕໍ່​ການ​ຜະລິດ​ຄືນໃໝ່ ແລະ ການ​ຟື້ນ​ຟູ​ເສດ​ຖະ​ກິດ.

ໂດຍ​ອີງໃສ່​ກົນ​ໄກ ແລະ ເວທີ ທີ່​ມີ​ຢູ່​ໃນ​ປັດຈຸ​ບັນ ເປັນຕົ້ນ: ບັນດາ​ໜ່ວຍ​ງານ​ວິຊາ​ການ​ຮ່ວມ​ຂົງເຂດ​ບຸລິມະສິດ​ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ແລະ ກອງ​ປະຊຸມ​ເຈົ້າ​ໜ້າທີ່​ອາວຸໂສ ແລວ​ທາງ​ການ​ຄ້າ ທາງບົກ ແລະ ທາງ​ທະເລ​ສາກົນ​ໃໝ່ ທີ່​ຜ່ານ​ມາ, ພວກ​ເຮົາ ຈະ​ສົ່ງເສີມ​ການ​ເຊື່ອມ​ສານ ລະຫວ່າງ ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ແລະ ແລວ​ທາງ​ການ​ຄ້າ ທາງບົກ ແລະ ທາງ​ທະເລ ສາກົນ​ໃໝ່.

ພວກ​ເຮົາ ມອບ​ໝາຍ​ໃຫ້ ສູນ​ສາກົນ​ເພື່ອ​ການ​ສຶກສາ​ແມ່​ນໍ້າ​ຂອງ (GCMS) ດໍາ​ເນີນ​ການ​ສຶກສາ​ຄົ້ນຄວ້າ​ຢ່າງ​ລະອຽດ  ກ່ຽວ​ກັບ ຜົນ​ປະໂຫຍດ​ບົ່ມ​ຊ້ອນ ທີ່​ໄດ້ຈາກ​ການ​ເຊື່ອມ​ສານ ແລະ ສະໜັບສະໜູນ​ຊຶ່ງ​ກັນ​ ແລະ​ ກັນ ລະຫວ່າງ ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ແລະ ແລວ​ທາງ​ການ​ຄ້າ ທາງບົກ ແລະ ທາງ​ທະເລ ສາກົນ​ໃໝ່ ທີ່​ມີ​ຕະຫຼາດ​ຂະໜາດ​ໃຫຍ່. ຜົນ​ການ​ສຶກສາ​ຄົ້ນຄວ້າ​ດັ່ງກ່າວ ຄວນ​ຖືກ​ນໍາ​ສະເໜີ​ຕໍ່​ກອງ​ປະຊຸມ​ເຈົ້າ​ໜ້າທີ່​ອາວຸໂສ ແລະ ກອງ​ປະຊຸມ​ລັດຖະມົນຕີ​ຕ່າງປະເທດ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ກໍາ​ນົດ​ຂົງເຂດ​ການ​ຮ່ວມ​ມື​ທີ່​ເປັນ​ບຸລິມະສິດ ແລະ ຮັບຮອງ​ເອົາ​ໃນ​ໂອກາດ  ກອງ​ປະຊຸມ​ຜູ້​ນໍາແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ຄັ້ງ​ທີ 4.

ພວກ​ເຮົາ ຈະ​ສືບຕໍ່​ຮັດ​ແໜ້ນ​ການ​ຮ່ວມ​ມື ລະຫວ່າງ ບັນດາ​ປະເທດ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ພາຍ​ໃຕ້​ຂໍ້​ລິ​ເລີ່ມ ໜຶ່ງ​ແລວ ໜຶ່ງ​ເສັ້ນທາງ ແນ່​ໃສ່​ເສີມ​ຂະຫຍາຍ​ການ​ເຊື່ອມ​ສານ ລະຫວ່າງ ຂອບ​ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ແລະ ແລວ​ທາງ​ການ​ຄ້າ ທາງ ບົກ ແລະ ທາງ​ທະເລ ສາກົນ​ໃໝ່ ເພື່ອ​ສະໜັບສະໜູນ​ການ​ສ້າງ​ປະຊາ​ຄົມ​ເສດຖະກິດ​ອາ​ຊຽນ.

ເອກະສານ​ສະບັບ​ນີ້ ໄດ້​ຖືກ​ຮັບຮອງ​ເອົາ ໂດຍ ສປປ ລາວ ແລະ ສປ ຈີນ ປະທານ​ຮ່ວມ​ກອງ​ປະຊຸມ​ຜູ້ນຳ​ຂອບ​ການ​ຮ່ວມ​ມື​ ແມ່​ ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ຄັ້ງ​ທີ 3 ໃນ​ວັນ​ທີ 24 ສິງຫາ  2020.

Medialaos MMD (ແຫູ່ງຂໍ້ມູນຈາກ: ໜັງສືພິມ ປະຊາຊົນ)