ໂຮງຮຽນປະຖົມ ແລະ ມັດທະຍົມ ສົມບູນກ້າວໜ້າ ມີ​ຄວາມ​ພ້ອມ​ໃນ​ທຸກ​ດ້ານ ​ເພື່ອ​ເປີດ​ສົກຮຽນ​ໃໝ່ 2020-2021 ໃນ​ວັນ​ທີ 1 ກັນຍານີ້​, ເປັນ​ຕົ້ນມີ​ຄວາມ​ພ້ອມ ດ້ານ​ບຸກຄະລາ​ກອນ, ຫລັກສູດ​ການ​ຮຽນ-ການ​ສອນ, ຫ້ອງ​ຮຽນ, ຄູ-ອາຈານ ​ແລະ ອື່ນ​ໆ ​ແມ່ນ​ມີ​ຄວາມ​ພຽງພໍ, ພ້ອມ​ທັງ​ເນັ້ນສືບ​ຕໍ່​ຈັດ​ຕັ້ງ​ປະຕິບັດ​ ມາດ​ຕະການປ້ອງ​ກັນ ​ການ​ຕິດ​ເຊື້ອ​ໂຄ​ວິ​ດ-19 ຢ່າງ​ເຄັ່ງ​ຄັດ.

ທ່ານ ບຸນ​ໄຫວ ຫລວງ​ລາດ ຜູ້ອຳນວຍການ​ໂຮງຮຽນປະຖົມ ແລະ ມັດທະຍົມ ສົມບູນກ້າວໜ້າ ​ແຈ້ງ​ໃຫ້​ຮູ້ ​ໃນ​ວັນ​ທີ 26 ສິງ​ຫາ 2020 ນີ້​ວ່າ: ໂຮງຮຽນປະຖົມ ແລະ ມັດທະຍົມ ສົມບູນກ້າວໜ້າ ໄດ້ມີ​ຄວາມ​ພ້ອມ​ໃນ​ທຸກ​ດ້ານ ເພື່ອເປີດການຮຽນ-ການສອນ ສົກຮຽນ 2020-2021 ໂດຍໄດ້ມີການປັບປຸງ, ທຳຄວາມສະອາດອາຄານສະຖານທີ່, ຫ້ອງຮຽນ, ໂຕະ, ຕັ່ງ, ອັນສຳຄັນໄດ້ຈັດຊຸດຝຶກ​ອົບຮົມ, ​ຍົກ​ລະ​ດັບຄວາມ​ຮູ້ ​ໃຫ້ຄູ​-ອາຈານ ແລະ ອື່ນໆ ​ເພື່ອ​ສ້າງ​ຄວາມເຂັ້ມແຂງ ໃຫ້ແກ່ໂຮງຮຽນ ກໍຄື ​ການ​ເປີດ​ສົກຮຽນ​ໃໝ່ໃຫ້ ມີບັນຍາການອັນຟົດຟື້ນ, ຮັກສາໄດ້ຄວາມເປັນລະບຽບຮຽບຮ້ອຍ, ສະຫງົບ, ປອດໄພ ​ແລະ ດຳ​ເນີນ​ການ​ຮຽນ-ການ​ສອນ ​ໃຫ້​ບັນລຸ​ຕາມ​ຄາດໝາຍ​ທີ່​ວາງ​ໄວ.

ທ່ານ ບຸນ​ໄຫວ ຫລວງ​ລາດ ໃຫ້ຮູ້ຕື່ມວ່າ: ໂຮງຮຽນປະຖົມ ແລະ ມັດທະຍົມ ສົມບູນກ້າວໜ້າ ມີ​ຄູ-ອາຈານ​ ທັງ​ໝົດ 50 ກວ່າຄົນ, ມີ 30 ກວ່າ​ຫ້ອງ, ສາມາດ​ຮອງ​ຮັບນັກຮຽນ ​ໄດ້​ທັງ​ໝົດ 1.700 ກວ່າ​ຄົນ, ນອກຈາກສອນ​ຕາມຫລັກ​ສູດ​ ທີ່​ກະຊວງ​ສຶກສາທິການ ​ແລະ ກິລາ ວາງ​ອອກ​ແລ້ວ ​ໂຮງ ຮຽນຍັງໄດ້ເນັ້ນໜັກ ການຮຽນ-ການສອນພາສາອັງກິດ ​ເພີ່ມ​ຕື່ມ​ສໍາລັບ​ຊັ້ນ​ປະຖົມ​ສຶກສາ, ​ເຊິ່ງນັກຮຽນຊັ້ນ​ປະຖົມ​ ຈະ​ໄດ້​​​ຮຽນພາສາ​ອັງກິດ ມື້ລະ 3 ຊົ່ວໂມງ ​​ໃນ​ພາກ​ບ່າຍ (13:00-15:00 ໂມງ). ນອກ​ນີ້, ​ໂຮງຮຽນຍັງ​ມີ​ນະ​ໂຍບາຍ ສຳລັບ​ນັກຮຽນ​ທີ່​ຮຽນເກັ່ງ ​ເຊັ່ນ: ສອບ​ເສັງ​ໄດ້ໃບ​ປະກາດ​ແດງ ​ແມ່ນ​ຈະ​ໄດ້​​ຮຽນຟີ (ບໍ່ໄດ້ເສຍ​ຄ່າ​ຮຽນໝົດປີ), ​ເສັງ​ໄດ້​ອັນ​ດັບ 1 ຂັ້ນ​ນະຄອນຫລວງ ​ແມ່ນຈະ​ບໍ່​ໄດ້​ຈ່າຍ​ຄ່າ​ຮຽນ, ​ເສັງ​ໄດ້​ອັນ​ດັບ 1 ຂັ້ນ​ເມືອງ ຫລຸດ​ຄ່າ​ຮຽນ 50% ​ແລະ ​​​​ເກັ່ງ​ຮອບດ້ານ ​ຫລຸດ​ຄ່າ​ຮຽນ 10%.  ສ່ວນຄ່າ​​ໃຊ້​ຈ່າຍ ​ໃນການ​ສຶກສາ ສຳລັບຊັ້ນ​ອານຸບານ 270.000 ກີບ (ບໍ່​ລວມຄ່າອາຫານ), ຊັ້ນປະຖົມ 250.000 ກີບ, ຊັ້ນມັດທະຍົມ​ຕົ້ນ 310.000 ກີບ ​ແລະ ຊັ້ນມັດທະຍົມ​ປາຍ 330.000 ກີບ ຕໍ່ຄົນຕໍ່ເດືອນ.

ສຳລັບ​ຜົນ​ການ​ສອບ​ເສັງໃນ​ສົກ​ຮຽນ 2019-2020 ຜ່ານ​ມາ, ​ນັກຮຽນຊັ້ນ ປ5 ຂອງໂຮງຮຽນປະຖົມ ແລະ ມັດທະຍົມ ສົມບູນກ້າວໜ້າ ສາມາດຍາດ​ໄດ້ນັກຮຽນເກັ່ງ​ຮອບດ້ານ 5 ຄົນ,  ມ4 ຍາດ​ໄດ້​ໃບ​ປະກາດ​ແດງ 1 ຄົນ ​ແລະ ​ເກັ່ງ​ຮອບດ້ານ 24 ຄົນ, ມ7 ຍາດ​ໄດ້​ເກັ່ງ​ຮອບດ້ານ 45 ຄົນ ສ່ວນ​ຊັ້ນ​ອື່ນໆ ​ແມ່ນ​ບັນລຸ​ຄາດໝາຍ ຕາມທີ່​ໂຮງຮຽນຕັ້ງ​ໄວ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)